Hnahthial DWSM chuan Kar Hnih Awh Tui Kut - Jal Mahotsav hawng

Hnahthial Post | March 9, 2026, Aizawl: Vawiin khan Hnahthial DC Meeting Hall-ah Er. Lalhmangaihzuala, PHED SDO, Hnahthial WATSAN Sub-Division kaihhruaiin Kar hnih awh tur Tui Kut – Jal Mahotsav hawnna hun hman a ni a. Hnahthial District Bawrhsap leh District Water & Sanitation Mission (DWSM) Chairman ni bawk, Pi K. Vanlalruati chuan khuallian niin he Kut hi a hawng a ni.

Khuallian chuan Hnahthial chu Mizoram District zawng zawng zingah tui hnianghnarna ber pawl a nih thu sawiin PHED hotute leh thawktute thawhrimna zar a nih thu leh fakawm a tih thu a sawi a. Jal Mahotsav thil tum ber chu tui hna humhalh leh enkawl kawnga mipuite zirtirna tha pek a, mipuite rilruah an tui tlan te ta neihna thinlung tuh a nih thu a sawi a. Tui hna kan tihchereu nasat thin avanga tui lama harsatna tam tak kan tawh thin chu pawi a tih thu sawiin zirtirna tha lehzuala kalpui a pawimawhzia tarlangtu a nih thu DSWM member kalkhawmte chu a hrilh a ni.

Jal Jeevan Mission chungchang sawi chhunzawmin Hnahthial chu District-ah hma la tha ber pawl an nih thu leh funding duh anga hmuh a nih thin loh avanga hmalakna khaihlak thin a nih thu a sawi a. DSWM member zawng zawngte chu tui lama Hnahthial khaw hrang hrangte harsatna chu lo ngaihven thin tura chahin thawhhonna tha tak nei zel a beisei thu a sawi bawk.

Er. Lalhruaitluanga, Sr.EE, PHED, Hnahthial WATSAN Division, Hnahthial chuan Jal Mahotsav chungchang sawi zauna neiin hman a nih chhan mai bakah JJM hnuaia hmalakna hrang hrangte a tarlang a. Tun dinhmunah chuan Hnahthial District-ah tui connection nei 5341 an awm thu tarlangin khawtlang miten an khua a tui lut chu neitu rilru tak tak an put theih nan an khaw chhunga tui lut senso zawng zawnga atanga za a panga (5%) chu an theih dan danin an tum ve thin thu a tarlang a. Hemi pual hian khawtlang hnenah inhlanchhawnna hun- Jal Arpan Diwas pawh South Vanlaiphai-ah leh Rawpuiah an lo neih tawh thu tarlangin khaw hrang hrangah neih tura ruahmanna siam a nih thu a tarlang bawk.

Jal Mahotsav Pakhwada chu March ni 8 atanga ni 22 chhung neih tura ruahmanna siam a nih thu sawiin hemi pual hian March ni 11 hian New Delhi-ah Category hrang hrang hmingin lawmman semna neih a nih tur thu a tarlang a. Heng Category zingah hian – Villages Demonstrating Exemplary Financial Stability Through User Charge Collection Efficiently tih hnuaiah an tui dawn te tangkai taka hmanga, pipe leak lo tura thiehtawp chhuahtu khua – S.Vanlaiphai chu an nominate thu a tarlang.

Hawnna programme hi Er. C.Lallawmzuala, JE PHED, Hnahthial WATSAN Sub-Division chuan lawmthu sawiin a khar a ni.

Tui Kut hawnna hun hi Hnahthial District Water & Sanitation Member-ten chhimin Nadi Sankalp (River Pledge) an chham nghal a. Jal Mahotsav hawnna hun hi DSWM meeting-in chhunzawm nghalin tul leh pawimawh zualte sawi ho a ni.