P&E Minister leh Adani Group aiawhte'n Megawatt 460 thar chhuak thei tur Chhimtuipui (Kolodyne) Hydel Project khuah dan tur an sawi ho

Hnahthial Post | March 10, 2026, Aizawl: Nimin, March ni 9, 2026 (Thawhtanni) tlai lam khan Pu F Rodingliana, Minister, Power & Electricity Department chuan a pisa-ah P&E Department hotute nen Adani Group aiawhte kawmin, 460 MW thar chhuak thei tur Chhimtuipui (Kolodyne) Hydel Project khuah dan tur leh Mizorama power sector tihhmasawnna kawnga Mizoram Sorkar leh Adani Group thawhho theih dan tur an sawiho.

P&E Minister Pu F Rodingliana hian Adani Group aiawha lo kalte chu lawmthu hrilhin, Mizoram Sorkar-in power intodelh a tumna kawngah thawhpui tur company tha a dap mek laia India rama company lian leh rintlak ber zinga mi Adani Group-te’n Mizoram lam hawia hmalak duhna an nei chu lawmawm a tih thu a sawi a. Minister hian hydro power sector-ah Mizoram hian potential sang tak a neih thu sawiin, chu’ng hai chhuak tur chuan puihna a mamawh a, Adani Group-te an rawn lang ta chu phurawm a tih thu a lo hrilh a ni.

Pu Sumit Verma, Vice President of Business Development - Hydro Pump Storage Project, Adani Group pawhin Mizoram Sorkar lo dawnsawnnaah lawmthu sawiin, tun hnaiah Adani Group chuan green energy development lamah nasa taka hma a lak thu leh he lama Mizoramin haichhuah tur a neihte haichhuahpui a, thawhhona tha tak an neih chhoh zel a beisei thu a sawi a. Project site-te a hmun ngeia tlawh tura lo kal an nih angin a hmun an kalchilh nghal dawn tih a sawi bawk a ni.

He inkawmnaah hian project site pahnih: Chhimtuipui (Kolodyne-II) Hydel Project ruahman mek leh Darzolui Pump Storage Project site-te chu Adani Group-te tlawh tura rel niin, March ni 10, 2026 atangin he’ng hmunhma tlawh hian an zinchhuak nghal dawn a ni.

P&E Minister hi P&E Commissioner Pi K Lalrinzuali leh Department Engineer-te’n an tawiawm a. Adani Group atanga rawn kalte chu Pu Sumit Verma, Vice President, Business Development - Hydro Pump Storage Project (PSP) bakah Arindam Banerjee, Senior Manager, Hydro PSP; Deepak Singh, Sr Engineer, PMAG and Hydro PSP; Sudhakar Rao, Dy Manager, Projects leh Narayanswamy, Manager, Projects & Hydro PSP te an ni.