Hnahthial Post | March 10, 2026, Aizawl: Vawiin khan Horticulture Department hmalakna hnuaia Chapchar Kut denchhena buatsaih Chapchar Kut Flower Show chu Aijal Club Park-ah hman ṭan a ni a. He Flower Show hi Horticulture Department Minister Pu C. Lalsawivunga’n hawngin, a hawnna inkhawm hi khuallian niin a hmanpui a. Horticulture Department Director Pu C.H. Lalmuanpuia’n hun a kaihruai a ni.
.jpeg)
Khuallian Pu C. Lalsawivunga chuan he Flower Show buatsaihtu Horticulture Department-a thawktute, Association hrang hrangte leh an pangpar tharchhuah mawi tak tak rawn phochhuaktute chungah lawmthu a sawi a. Mizoram mipui mai nilo, India ram hmun hrang hrang leh khawvel ram dang atanga khualzinte pawhin flower show hi hmu ve se a duh thu sawi a. Mipuite chu khualzin thleng thiam leh dawngsawng thiam an nih a pawimawh thu sawiin, Mizoram hi khualzin hiptu ram mawi leh nuam taka kan siam a ngaih thu a sawi a. Mizorama hnam hrang hrang chenghote chu he flower show-a pangpar chi hrang hrang mawi tak takte anga Mizoram tana par chhuak ve turin a sawm a. Kumin Chapchar Kut thupui hi inremna a nih angin Mizoram chhunga cheng zawng zawngte hian hnambil leh chibil rilru pu lova, inpumkhatna tha kan neih a pawimawh, a ti a. Kan zavaia thinlungah Chapchar Kut hian inremna rawn thlen se a duhawm hle tih sawiin, mitinte hlim tak leh nuam taka Chapchar Kut hmang turin duhsakna a hlan nghal a ni.
.jpeg)
Kumin 2026-ah hian Chief Minister kaihhruaina hnuaia Chapchar Kut Organizing Committee ruahmanna leh Horticulture hmalakna-in Chapchar Kut Flower Show 2026 hi March Ni 10-12 chhungin Aijal Club Park-ah hman a ni dawn a. He Flower Show-ah hian pangpar chi hrang hrang leh Bonsai-te mawi taka pholan a ni a. Pangpar zuar duhte tan Stall 72 buatsaih a ni a. UD&PA ngenna zawmin Chapchar Kut Flower Show chhung hian bawlhhlawh tello-a hun nuam tak hman a nih theih nan Hman khat daih (Single use plastic) hmang tlem tura inzirtirna uar taka kalpui a ni bawk.
.jpeg)
He Flower Show hi Covid-19 hunlai (2021-2022) tihloh chu 2019 atang khan kumtin hman a ni a. Kum 2023 khan Chapchar Kut & G20 Summit Flower Show-cum-Fair hman a ni a, hemi hunah hian India ram chhung mai bakah ram hrang hrang 17 atangin G20 delegates ten an rawn chhim a, theihtawpa ropuia inbuatsaih niin chhimtute pawhin hlawhtlak an ti hle a ni. Chapchar Kut Flower Show hi Horticulture Department leh Association pali - Mizoram Florists’ Association (MFA), Zo-Anthurium Growers Co-operative Society (ZAGCS), Bonsai Association of Mizoram (BAM) leh Orchid Society of Mizoram (ORSOM) te ṭangkawpa buatsaih ṭhin a ni a. Pawl hrang hrangte chet velna senso hi Horticulture Department bultum a ni ṭhin. Heng Association-te hian an item chi hrang hrang mawi takin an pholang ṭhin a. Chu mai bakah pangpar chin lama eizawngte ṭan inzawrhna hmun stall siamsak an ni ṭhin.
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
.jpeg)
Tags
News