'Safe Products, Confident Consumers' tih thupui hmangin Hnahthial-ah World Consumer Rights Day hman a ni

Hnahthial Post | March 17, 2026, Hnahthial: Vawiin khan Horeb Conference Hall-ah Hnahthial District Civil Supplies Office bultumin World Consumer Rights Day hman a ni a. Pu HD Lalpekmawia, Project Director, DRDO Hnahthial chu khuallian ni a hmanpuiin Dr. Michael Solo, District Civil Supplies Officer kaihhruaina hnuaiah he hun hi hman a ni. Thupuiah 'Safe Products, Confident Consumers' tih hman a ni.

Pu HD Lalpekmawia Project Director DRDO chuan Consumer Rights chu US President hmingthang tak John F. Kennedy hun lai kum 1962 atanga lo hman tan tawh a nih thu sawiin mtin mai chu engemaw ti kawng zawng takin Consumer kan nih vek thu a sawi a. Kan
dikna chanvo leh tihtur te kan hriat a tul tih sawiin sumdawng thenkhat ten an mahni dawrtute an ngaihtuah tawk lo thin leh diklo taka sum an eisak thin chu mihring dikna chanvo in rahbehsakna pakhat a nih thu a sawi. Thil kan lei emaw kan dawr dawn hian Consumer-te chuan duhthlantheihna kan nei a ni ti hre turin mipuite a duh thu sawiin chung ti theilo khawpa a zuartuten an khap leh an phalloh thin hi Consumer Rights dan bawhchhiatna a nih thu a sawi bawk.

Khuallian chuan sumdawngte chu mipui tana thil him tawk lo zawrh chhuah kawngah pawh mawh nasa taka an phurh thu a sawi a. Mipui mamawhna leh indaihlohna denchhena thil man tih tho chu Consumer Rights dan bawhchhiatna niin an dikna chanvo te hria a huaisen taka dikna vawng nung zel turin kal khawmte a chah nghal a ni.

Hnahthial District Consumer's Union President Pu P. Vanlaltluanga pawh in thu sawiin Consumer leh Consumer Union te hnathawh leh mawhphurhna te a sawifiah a. Consumer Union-te chu lawmman pawh nei lova Consumer tupawh an dikna chanvo hmu lova awm te tanpui chu an hnapui ber a nih thu sawiin Consumer Union chu pawl lian tak, Parliament pawh in a hriatpui thlap a nih thu a sawi a. Pawl anga an hmalakna te mipui ten lo thlawp a, tih tur a sawi ang te tha tak a lo zawm zel turin a sawm nghal bawk a ni.

Pu K. Lalhunmawia, Secretary, HDCU chu Resource Person niin World Consumer Rights Day 2026 thupui 'Safe Products, Confident Consumers ' sawifiahna hun a hmang a. Pu Zoramdinthar chuan lawmthu sawiin hun hi a khar a ni.