Hnahthial Post | April 10, 2026, Aizawl: Vawiin ni 10 April, 2026 (Zirtawpni) khan Mizo Zirlai Pawl rorelna sangber dawttu Federal Council vawi 60-na (2025-27 termah vawi 1-na) RANSAM CK RESORT, Thuampui Vengthar-ah neih a ni a, Federal Council palai 115 kalin, Pu Sanghmingthanga, Vice President chu Chairman a ni a, Pu Rothanliana, Treasurer chu Vice Chairman niin, Dr. C. Lalremruata, President chu House Leader a ni..
House Leader, MZP President ni bawk Dr. C. Lalremruata chuan House Address neiin, "MZP Headquarters, Sub- Headquarters leh Branch, Hnampual zirlai pawl leh College SU te chuan hruaitu kan nih chhung hi chuan zirlaite tana tha tur, zirlaite hmasawnna tur leh ram leh hnam hmasawnna tur thil hi ngaihven leh zual turin a sawm a. Kan zirna a that phahna tur leh kan ramin hma a sawnna turte, kan ramin a hlawkpuina turah chuan engpawh ti dawn ila MZP chu kan in ring reng tur a ni" a ti.
Tun hnaiah Mizoram-ah hnamdang (Vai) phalna neilo a lokal an tam thu sawiin kan hnam inhungbikna ILP venhim hi mitin mawhphurhna a ni a, tlang hrang hranga MZP hruaitute pawh kan hnam, kan ram a him theihna turin kan chhehvel hrechiang lehzual a, kan inhumhimna ILP hmang tangkai tur leh check ngun leh zual turin House Leader chuan rorel palaite a sawm a ni.
MZP President chuan, "MZP danbu-in min hrilh angin 'Pi leh pute atanga Zofate luah chin ram rorelna pakhat hnuaia awm' tih chu MZP-in kan kal pui reng a ni a. Tun hnaiah mi tam zawkin Mizo inti duhlo inlo kuahkuah reng angai a mi tih zawhna kan dawng tam hle a. MZP chuan kan unaute theihtawp chhuaha lo kuangkuah hi kan tih tur a ni a, chutih rual chuan Mizo hming pu a thangthat lak tum, intih Mizo derna hi awm tawh lo se tih chu MZP duh dan a ni a, Zofate hi kan inhmangaih tlat loh chuan hmangaihtu kan nei chuanglo tih hi Zofa zawng zawngte'n hre thar leh turin ka sawm duh bawk che u a ni" a ti bawk.
MZP Federal Council vawi 60-na chuan a hnuaia tarlante hi a tul anga hmalak chhunzawm turin lungrual taka pawm a ni:-
1. Mizoram-a Inner Line Permit (ILP) hman dan kalphung (System) hi tun aia khauh zawk leh changkang zawka kalpui a nih theih nan MZP-in hma la rawh se.
2. Zirtirtu indaihlohna rualkhai zawka phuhruk/ sem-rual a nih theih nan nasa zawkin Sawrkarin hma la rawh se.
3. Mizoram State University din turah hian, dik leh felfai taka hnalak a nih theih nan MZP in hma la rawh se.
4. Zirna In hrang hrangah Zounun Zemawi inzirtirna kalpui a nih theih nan MZP in hma la rawh se.
5. Mizoram University-in MZU Sports a buatsaih thin-ah hian tun aia Budget a tam theihna turin MZP in hma la rawh se.
6. Common University Entrance Test(CUET) UG/ PG Exam Center tam zawk Mizoram-ah a awm theih nan hmalak ni rawh se.
7. Mizoram College zawng zawngte'n Principal nghet kan neih theih nan a tul angin Sawrkar-in hma la rawh se.
Rorel zawh hnu hian, Leadership Training neih nghal a nia, Pu Peter Lalzawmliana, Adviser MZP-GHQ chu Resource Person niin, rorel palai kalkhawmte'n an hlawkpui hle a ni.
Tags
News