Sports Minister-in Tuichangral Games 2026 Khawhai-a neih tur hawng

Hnahthial Post | April 13, 2026, Aizawl: Nizan dar 7:30 khan Sports & Youth Services (SYS) Department Minister Pu Lalnghinglova Hmar chuan Tuichangral Games & Sports Association (TGSA) buatsaih, April 13 – 22, 2026 chhunga Khawhaia neih tur, Tuichangral Games 2026 hawnna inkhawm chu Khawhai Town Hall-ah khuallian niin a hmanpui a. Hrangturzo bialtu MLA Pu Lalmuanpuia Punte, Adviser to CM ni bawk chu khualzahawm niin, TGSA Sr. Vice President Pu Lalrengpuia Kawlni chuan inkhawm a kaihruai a ni.

Minister Pu Lalnghinglova Hmar chuan Tuichangral Games chu GSA leh mipui tangrualin an buatsaih a nih avangin a ngaihlu hle tih a sawi a. Sports Minister dinhmun a luah tirha a tih hmasak ber pakhat chu Tuichangral leh Tuipuiral Games tihmasawn tura hmalak a ni, a ti a. Tuichangral mipuite'n Games chu lo ngaihlu sauh sauh tur leh, a bikin kum naupang zawk tana Olympic sports discipline-a inelna buatsaih thin chu ngai thutak zel turin a chah a ni.

Sports Minister chuan sawrkarin Olympic 2036 hmathlir neiin a bulthut atangin sports a kalpui tih a sawi a. "Infiamna thenkhatah India rama langsar pha khawp kan nih avangin sports-a sâng ta viau ah kan inngai maithei. National Games darthlalangah kan dinhmun dik tak pholan in a awm thin a, India rama infiamna khawmpui lianah a hnuai lamah zel kan awm thin. Chu chu thlak kan tum a, sports infrastructure leh thildang kan ngaih pawimawh rualin infiammite theihna tihhmasawn kan ngai pawimawh ber a, a bulthut atangin coaching tha pek kan duh” a ti a. Empowering Mizoram Sports (EMS) kaltlangin Mizoram sawrkarin infiammite bana kaihna tur a kalpui mek tih a sawi a, infrastructure lam buaipui țhulh loin a pawimawh zawk infiammite chher chhuah chu an tum lian ber a nih thu a sawi bawk.

Pu Lalnghinglova Hmar chuan EMS chu a taka kalpui mek tawh a ni a, Mizote thiam zawng, India pawh a thatna Olympic sports discipline thlanchhuah pariat - Archery, Badminton, Boxing, Hockey, Judo, Taekwondo, Weightlifting leh Wrestling - ah te naupang kum 8 - 15 inkar tan ni 15 (darkar 45) chhung coaching kalpui a ni tih a tarlang a. Coach hi EMS website kaltlanga dil tur niin, coach diltu khua/veng te'n an kal man leh thlenna an tum ang. Hei hi khawtlang leh mipuiin neitu nihna rilru pu-a theihtawp an lo chhuah ve nan ruahman a nih thu a sawi a. Sawrkarin coach tur pawh a uluk a, JICA India nen tangkawpin December 2025 khan Nippon Sports Science University, Tokyo-a mithiam bik te'n Mizo coach-te training an pe tawh tih a sawi bawk. Tuichangral huam chhunga khuate chu EMS hnuaia coach dil theuh turin a sawm nghal a ni.

Sports Minister hmalakna-in kum 2025 atangin Tuichangral Games leh Tuipuiral Games-ahte naupang zawk tan Olympic sports discipline-ah inelna buatsaih thin a ni a. Kumin Tuichangral Games-ah pawh hian Mizoram State Sports Council (MSSC), sports association leh Tuichangral GSA-te tangrualin kum 16 hnuailam tan Boxing, Weightlifting leh Wrestling-ah inelna buatsaih leh a ni ang. Inelna buatsaihna'n sawrkar atangin sports association-ah Rs. 1,00,000/- theuh leh Tuichangral GSA ah Rs. 50,000/- pek thin a ni a. GSA a pek thin hi nakum atang chuan Rs. 1,00,000/- ah tihpun a nih tur thu leh, Tuichangral Games buatsaihtute an inhawn chhung chuan EMS sports discipline dangah pawh sawrkarin a puih zel tur thu Sports Minister chuan a puang a ni. Sports Minister chuan Tuichangral Games thlengtu Khawhai field tihhmasawnna'n cheng nuai 15 dah a nih tawh thu a puang bawk.

Khualzahawm Pu Lalmuanpuia Punte pawhin thu sawiin, Tuichangralte sports lama hma an sawn chu lawmawm a tih thu a sawi a. Infiamna hi inunauna titha zawng leh tihmasawn zawnga kalpui a nih loh chuan khua leh khua inerna leh inhuatna thlentu a ni duh khawp mai, a ti a. Infiamna hi a tha zawnga kalpui zel turin leh talent nei tha tak takte zawn chhuahna atana tangkai taka hmang turin duhsakna a hlan a ni.

He hunah hian Women & Child Development atangte, MBOCWW leh LESDE atangte-in thusawi ngaihthlak a ni a. Sawrkar official-te leh khawtlang mipui thahnem tak an tel a ni.

Tuichangral Games 2026 hi a ṭum 15-na a ni a. Kum 1970 khan ‘Tuipui, Tuichangral Mini Olympic’ (TTMO) tiin infiamna hi an lo kalpui tawh a, kum 3 chhung kalpui a nih hnuah sum lam harsatna avangin chawlhsan niin, kum 1982 khan mi ṭhahnemngaiten Tuichangral Games hming vuahin an din thar leh ta a ni. Kum 12 chhung zet kalpui a nih leh hnuah sum lam harsatna avang bawkin chawlhsan a lo ni leh a, kum 2005 khan Tuichangral khawchhuak mi ṭhahnemngaite zarah mi 8 sponsor-na hnuaiah neih chhoh a lo ni leh ta a. Kum 2014 khan khawchhak lam Tuipuiral nen infinin ‘Tuipui, Tuichangral Games’ tiin khawchhak lam leh khawthlang lam nen inthlen chhawkin kum 3 chhung neih a lo ni tawh bawk.

Tuichangral Games 2026 ah hian Football (mipa leh hmeichhia), Volleyball (mipa leh hmeichhia) bakah kum 16 hnuai lam tan Boxing, Wrestling leh Weightlifting-ahte inelna neih a ni dawn a. He Games-in a tum ber chu India-in kum 2036 Olympic thleng tura a inbuatsaih mekah Mizo ten infiammi, India aiawh tur kan thawh ve ngei theih nan kum sawm leh paruk (16) hnuai lamah nasa taka ṭan lak hi a ni a. Kum 2036 Opympic hmathlir nei chungin Chief Minister leh Sports Minister ruahmanna-in kum 16 hnuai lam tan Boxing, Wrestling leh Weightlifting pawh hi buatsaih a ni.