Hnahthial District chhungah Sawhthing quintal 9,135.53 hralh chhuak tawh

Hnahthial Post | May 8, 2026, Hnahthial: Hnahthial District chhungah kuthnathawktute thar sawhthing quintal 9,135.53 hralh chhuah a ni tawh, hralh tur engemaw zah a la awm.

Hnahthial District Agriculture Marketing Committee (DAMC) Secretary leh DAO Pi Julie Zodinpuii'n kan palai a hrilh danin, kum hian Hnahthial District chhunga kut hnahthawktute thar chhuah sawhthing quintal 9,135.53 hralh chhuah a ni tawh a, hralh chhuah tur eng emaw zah a la awm bawk. Sawhthing hralh chhuah zinga quintal 8762.83 chu support price pek ngai niin quintal 372.70 chu support price pek ngai lo, kg-a Rs 50 chung lama hralh a ni thung.

DAMC hotute sawi danin Pangzawl leh Chhipphir SCC te chuan hralh tur an neih ang an hralh zo thawkhat tawh a, Cherhlun, Hnahthial one leh two SCC te hian hralh tur engemaw zah an la nei dawn a, kg-a Rs 50 chin chung lama lei duh an awm chuan SCC kaltlang kher lovin sawhthing neituten an hralh nghal thei ang a, sawhthing rate hi Kg-a Rs 50) aia a hniam chuan SCC ten kudam-ah an dah ang a, sorkar in support price a pek anga kalpui chhunzawm leh a ni dawn a, sawhthing hi leiru tur (buyer) an awm loh pawhin sorkarin kuthnathawktute hnenah Rs 50) in a lei sak vek dawn tih an sawi bawk a ni.