Hnahthial Post | May 19, 2026, Hnahthial: Mission Shakti hnuaiah District Hub for Empowerment of Women (DHEW) bultumin vawiin khan DC Meeting Hall-ah fate chawm seilen kawnga nu chhuanawm pahnih - Pi Biakchhungi leh Pi Vanlalliani te chu Hnahthial Bawrhsap, Pi K. Vanlalruati chuan chawimawina thuziak (citation) leh pawisa fai a hlan a. Bawrhsap chuan chawimawina dawngtute bakah Nute ni puala hetiang buatsaih nachang hria, Women & Child Development-te chu fakawm a tih thu a sawi.
Bawrhsap chuan Nu fel leh chhuanawm tak pahnih hnenah chawimawina a hlan thei chu lawmawm a tih thu sawiin, Pa tel lova fa puitling tak tak an enkawl seilian chu fakawm a tih thu a sawi a. Pi Biakchhungi leh Pi Vanlalliani te chuan an fate chu chawm seilian satliah mai lova mahni inchawm thei, mi puilting tak veka an chhuah chu ropui a tih thu sawiin a dawng tur tak ten chawimawina an dawng ni a a hriat thu a sawi. Hei bakah hian he hun buatsaihtu, Women & Child Development lama thawktute chu fakawm a tih thu sawiin thil tihchhunzawm zel tlak tak ni a a hriat thu a sawi bawk.
Chawimawina dawngtu, Pi Biakchhungi w/o Hrangliana (L) hi Pangzawl Khawngbawk venga mi niin fa sawm leh pakhat (11) a nei a. A fate pahnih hi boral tawhin a pasalin an boral san hnu hian amahin fa pakua (9) hi a rem rem thawk chungin a chawm puitling vek a. A fate hi tunah chuan a then sawrkar hnaah te lutin a thenin dawrte an siam a, anmahniin an intodelh vek tawh a ni.
Chawimawina dawngtu Pi Vanlalliani w/o Biakhmingliana (L) hi Tarpho khua a cheng niin a pasalin a boral san hnu hian a theih theih a inhlawhin a fa panga (5) te chu a chawm seilian a. Tunah chuan a fa upa ber hian High School zirtirtu hna thawk mekin thenkhatin Missionary hna an thawk a, an naupang ber hian computer a zir mek bawk a ni.
Chawimawina hian thuziak (Citation) bakah pawisa fai cheng sang nga (Rs. 5000) a keng tel a ni.
Programme hi Pi F. Lalnuntluangi, Child Development Project Officer (CDPO) kaihhruaina hnuaiah DHEW thawktute nen hman a ni.
Tags
News