Cooperation Minister-in MIZOFED Annual General Assembly vawi 28-na hmanpui

Hnahthial Post | June 9, 2026, Aizawl: Vawiin khan Cooperation Department changtu Minister Pu P.C. Vanlalruata chuan MIZOFED (Mizoram State Cooperative Marketing and Consumers Federation Ltd.) Annual General Assembly vawi 28-na Dawrpui Multipurpose Centre-a an hmanna chu khuallian niin a telpui.

Cooperation Minister chuan MIZOFED inkhawmpuilian vawi 28-na a hmanpui thei chu lawmawm a ti a. Kum 2025-26 chhunga MIZOFED annual report tarlan anga cheng ₹9,77,06,787.15 (provisional) lai mai hlawkna (net profit) an tel thei chu hma an sawnzia tilangtu a ni, a ti a. Minister chuan sawrkarin kuthnathawkte a ngaihpawimawhzia sawiin, sawrkar flagship policy kalpui mekte mila Cooperative Society-te nen thawhhona tha zawk an neih theih a beisei a, heng atan hian sawrkar chuan Society-te chu thawhpuia chawikan theihna apianga chawikan a inhuam reng thu a sawi bawk.

He programme-ah hian Mizoram Cooperative Societies-a Registrar Pu John L.T. Sanga pawhin thu a sawi a. Cooperative Society-te chu chhawmdawl leh chawikan a pawimawh a, India state danga Cooperative Society-te changtlunzia leh an hlawkna tel dan entawnin Mizoram pawh kan inzir ve thei, a ti a. MIZOFED pawh hmasawn zel turin a duhsak thu leh an output (dehchhuah) tipung zela Mizoram tan rawngbawl zel turin Pu John L.T.Sanga chuan a chah a ni.

MIZOFED hi Marketing & Consumer Federation a nih angin sumdawnna a khawih ber a, tuna sumdawnna lama a hma lakna lian deuh hlawm thuma then theih te chu:

1. Petroleum Oil Lubricants (POL)

2. Liquefied Petroleum Gas (LPG)

3. Essential Commodities & Consumer Goods (E&C)

He hunah hian kum 2025-26 chhunga MIZOFED sumdawnna hlep leh hloh dinhmun Head Office-in a chhut chhuah (la audit loh) chu tarlan niin cheng ₹9,77,06,787.15 lalut anga chhut a ni.

Vawiin programme-ah hian MIZOFED Chairman Pu K.Rothangpuia chuan chairman niin inkhawm hi a kaihruai a, MIZOFED Managing Director Pu Lalhruaitluanga chuan Annual Report (2025-26) pein, MIZOFED Vice-chairman Pu Vunghnuna chuan lawmthu sawina neiin inkhawm hi a khar a ni.