Hnahthial District Task Force on Immunization thukhawmin Sub National Immunization Day hman dan tur rel

Hnahthial Post | June 23, 2026, Hnahthial: Vawiin khan District Task Force on Immunization (DTFI) chu an Chairman leh Hnahthial Bawrhsap ni bawk, Pi K. Vanlalruati kaihhruaiin DC meeting Hall, Hnahthialah thukhawmna neih a ni a. Kumin atana Sub National Immunization Day (SNID) chu nikum lama hman tawhna, Health & Wellness Centre, Electric Vengah hman leh ni se ti a rel a ni.

Bawrhsap chuan Sub National Immunization Day hman a ni leh tur chu lawmawm a tih thu sawiin thawktute pawh naupangten an vaccine lak tur ang te an lak ngei theih nan theihtawp chhuah zel turin a fuih a. Kumin chu Hnahthial District bila vawi khat SNID hmanna tur a nih dawn avangin District ang pawhin a hlut lehzual tur thu a sawi bawk.

Sr. CMO leh Member Secretary ni bawk, Dr. Lalnunziri chuan SNID ah hian polio vaccine chiah pek tur a nih thu sawiin naupang kum 5 chin hnuai lam hnenah pek tur a nih thu a sawi a. Kum 2014-ah polio hi India ramah um bo ni tawh mah se kan thenawm ramah a la hluar avangin kum tin hian inven nan vaccine hi pek reng a nih thu a sawi a ni.

Kumin Sub National Immunization Day hi July ni 1 ah Health & Wellness Centre, Electric Vengah neih tur a ni dawn a. Dar 11:30 am ah neih tur niin Bawrhsap leh DTFI Chairman chu khuallian a ni ang a. SNID ah hian Vaccine hi Booth 40-ah pek tur niin vaccine hi target beneficiaries ( naupang kum 5 chin hnuaiah) 2315 hnenah pek tura ruahmanna siam a ni.

Thutkhawmnaah hian CDPO, DIPRO leh DEO office dang aiawh bakah member hrang hrangte an tel a ni.