MZP-in Kum 2005 E-Roll a khaw awm lo, Kum 2024 a awm thar khaw 97 leh India leh Bangladesh khua leh tui nihna nei kawp a hmuchhuak

Hnahthial Post | June 23, 2026, Aizawl: India ram pum huapa Election Commission of India (ECI) in Special Intensive Revision (SIR) a kalpui mek chu India khua leh tui dik takte tana dikna chanvo humhimna leh Electoral Roll dik tak leh thianghlim zawk kalpui tumna a nih avangin MZP chuan a thlawp tlat a. Mizoram chhungah pawh SIR hi Mizoram mi leh sa dik takte chauh an awm theihna tura kalpui anih theih nan, theihtawp chhuah turin MZP chuan thuneitute a ngen nghal bawk a ni.

MZP chuan, ram leh hnam humhimna kawngah hun rei tawh tak atang khan hma alo la thin a. Bangladesh atanga Chakma Foreigner rawn lutte, India khua leh tui nihna pawh neilo Electoral Roll a an lut thin leh Electoral Roll a Chakma Vote pung chak lutuk chu a vei hle a, kum 1995 December thla a Electoral Roll Intensive Revision neih tum pawh khan Electoral Roll Officer leh a hnathawktute enpuiin Mizoram hmun hrang hrangah MZP te chu an lo feh chhuak hial tawh a ni. Chakma foreigners mi sing chuang teh meuh mai roll atangin paih a ni a, Tlabung Constituency-ah phei chuan voter 4,000 chuang paih an ni. Tin, Kum 1996-ah Chakma foreigners te Mizoram chhuahsan tura nawr nan Long march chu May thla khan Aizawl atanga Chawngte thleng a lo kalpui tawh bawk a ni.

MZP chuan, Election Commission of India in Special Intensive Revision (SIR) a kalpui mekah Mizoram State chhunga thawktu Chief Electoral Officer (CEO) leh a thawhpuite chu India khua leh tui dik takte humhimna SIR an kalpui naah hian dan ang taka hmala turin a ngen nawn leh a. Tun hma atanga Chakma Foreigner te avanga Mizoram khua leh tui dik tak tena harsatna an tawk fo thin chu hriatthiam har a tiin, SIR kaltlanga dan lo anga Electoral Roll a awm zawng zawngte chu paih vek turin MZP chuan Chief Electoral Officer (CEO), Mizoram leh a hnuaia hnathawk DEO, ERO leh AERO te chu a ngen a. Booth Level Officer (BLO) te pawh rinawm leh dik taka thawk tur leh khua leh tui nilo te chu paih ngam turin a ngen nghal bawk.

MZP chuan, Mizoram-ah Special Intensive Revision (SIR) dik leh felfai taka kalpui a nih theihna turin tun hma atanga Foreigner pun chakna thin Constituency thenkhat a enfiah a. SIR in a base 2005 E-Roll leh roll thar ber E-Roll (2024) atangin danglamna khaikhin a ni a, Chakma khua bikah vote percent punna sang lutuk leh 2005 E-Roll a khaw awm lo, 2024 a khaw 97 rawn awm tharte leh India leh Bangladesh khua leh tui nihna nei kawpte MZP in a hmuchhuak a, E-Roll a House number awm lo pawh hmuh chhuah a ni. Hemi chungchangah hian, Chief Electoral Officer (CEO) hnehah complaint thehluh a ni dawn a, Complaint a tarlan khaw 195 te chu Special Intensive Revision (SIR) kalpui mekah en uluk leh zual turin a ngen nghal a, heng khaw 195-ah hian SIR hi kalpui a nih tawh pawhin, DEO te nen ngei ennawn leh turin MZP chuan a ngen a, he hmalaknaah hian a tul anga thuneitute thawhpui a inhuam reng a ni.