State Water and Sanitation Mission Apex Committee an thukhawm

Hnahthial Post | June 9, 2026, Aizawl: Vawiin chawhnu khan Chief Secretary Pu Khilli Ram Meena kaihhruaiin State Water and Sanitation Mission Apex Committee chu Chief Secretary Conference Hall, MINECO-ah an thukhawm a. Pu D. Senthil Pandiyan leh Pi Swati Meena Naik, National Jal Jeevan Mission Joint Secretary-te nen biakhmuhtheihna (Video conferencing) hmanga inbiain sawrkar laipui scheme Jal Jeevan Mission(JJM) hnuaia Mizoram-a hnathawh kal mekte leh JJM 2.0 hnuaia an hmachhawp te an sawiho a ni.

Pu Senthil Pandiyan chuan thutkhawma tel te hnenah JJM 2.0 thiltum leh nihphungte a hrilhfiah a. JJM 2.0 hian thil hlu siam (asset creation) chauh ni lovin, a tlona te, a rintlakna te, hnathawh turte hun taka zawh thin te, inrelbawlna siamṭhat (governance reforms) te leh mipuite tel vena (public participation)te a tum zawk thu a sawi a ni.

Chief Secretary Pu Khilli Ram Meena pawhin JJM 2.0 scheme a hlawhtlin theih nan department hrang hrangte thawhhona tha neih a pawimawh thu a sawi a ni.

Jal Jeevan Mission chu December 2028 thleng pawhsei a nih tak avangin Mizoram sorkar leh Ministry of Jal Shakti, Department of Drinking Water & Sanitation te chuan May ni 6, 2026 khan Jal Jeevan Mission 2.0 kalpuina tura inremna thuthlung (Memorandum of Understanding) an ziak a. Mizoram-ah JJM 2.0 scheme kalpui nana Comprehensive Implementation and Reform Plan (CIRP) chu vawiin thutkhawmah pawm a ni.