Hnahthial Post | July 4, 2026, Hnahthial: Vawiin chhun khan Hnahthial DC Meeting Hall-ah Election Commission of India hnuaia Special Intensive Revision (SIR), 2026 neih mek kal zelah 29-South Tuipui Assembly Constituency Draft Electoral Roll chu Hnahthial District Election Officer, Pi K.Vanlalruati chuan a tlangzarh a. South Tuipui Constituency-ah hian Enumeration Form 16,478 sem chhuah niin Form 15,443 Digitized an ni.
District Election Officer chuan Draft Electoral Roll tlangzarh a ni ta chu lawmawm a tih thu sawiin BLO leh Election lama thawktute thawhrimna zar a nih thu a sawi a. Enumeration process chu zawh fel ni tawh mah se inthun, siamthat leh paih dilna thehluh hun chhung (Claims and Objections phase) kan hmachhawn dawn chiah avangin BLO leh VC te chu an bial theuh va awm thin, tel awm tak tel ta lo te lo en chik turin a chah a. Tun Draft roll-a chuang lo, inthun luh dilte tan hearing neih a nih dawn thu sawiin hearing neih hunah chuan he huna kalkhawmte bakah khawtlang hruaitute zawng zawng chu an pawimawh thu a sawi a. Hearing chu in hmai zah hun a nih loh thu sawiin a pawi hma, hearing neih lai ngeiin sawi tur pawimawh chu sawi hreh lo turin khawtlang hruaitute zawng zawng chu a sawm a ni.
Electoral Registration Officer, Pu Zothanmawia Khiangte chuan tun SIR ah hian roll atanga paih tam tak an awm thu sawiin an paih tam zawk chu boral leh pem sawn te an nih thu a sawi a. Unmapped kan tih mai, 2005 e-roll a mahni chuang lo emaw, chhungte chuang chhui zawn tur nei lo tan pawhin hearing neih a tul thu a sawi a ni. Chutiang unmapped ho chu 2005 hnu lamah vawi tam vote pawh lo thlak tawh mah se, hearing hunah dan ang taka pawm theih tur chhan tha tak an nei a nih loh chuan paih tho tur an nih thu a sawi bawk. Chutiang paih ngai an awm a nih chuan khawtlang hruaitute chu let lehna tur an nei loh chhuanlam a, lo hum lo hram turin a ngen nghal a ni.
Election Officer, Pu S. Kaptluanga chuan inthlanna thianghlim nei tur chuan a hmasa berah electoral roll thianghlim neih a tul thu sawiin chumi nei thei tur chuan inhriatthiamna leh induhsakna ni lo va, Dan ang taka kan kal a tul thu a sawi a. Kan thenawm ram atanga rawn lut tam tak pawh, India khua leh tui dik tak an nih loh chuan tel lui tum hram lo turin NGO te, Kohhran hruaitute leh kalkhawmte chu a ngen a ni.
He SIR 2026 Draft Roll tlangzarhna hunah hian Political Party aiawhte, Village Council hruaitute, Hnahthial Town chhunga BLO-te leh NGO hrang hrang hruaitute an tel a ni.
SIR,2026 kalpui a nih hma hian 29-South Tuipui A/C ah Elector 16478 awmin Polling station 27 a awm a. Enumeration phase zawh fel hnu hian chung 16478 zingah chuan mitthi 574, hmung danga insawn mi 358, e-roll a awm nawn 32 leh chin hriat loh mi 71, an vaiin mi 1035 te chu paih an ni.
Draft Electoral Roll atanga a lan danin Enumeration Form sem chhuah atanga Digitized theih hi electors 15443 an awm a. Heng zingah hian 2005 e-roll a chuang tawh sa mi 6376 awmin 2005 e-roll a hming la chuang hman lo, chhungte chhuizawn atanga chuang, mi 7884 an awm bawk. 2005 a anmahni emaw, an thlahtute emaw chuang lo mi 1183 awmin heng mite hian ERO/AERO hmaah hearing an neih a ngai dawn a ni.
Hnahthial-II (Bazar leh Kanaan) bakah Hnahthial-III (Model Veng leh Venglai) Polling Station siam rem (rationalized) niin Kaanan leh Venglai tan Polling Station thar Hnahthial-VII siam a ni a. Hnahthial-IV (Chanmari leh Lungleng) pawh siam rem (rationalized) a ni a, VC area angin Part of Lungleng chu Hnahthial-III ah an lut a, Hnahthial-III ah hian Model leh Part of Lungleng awm tawhin, Hnahthial-IV ah Chanmari leh Part of Lungleng an awm dawn bawk a ni.
Draft Roll tlangzarh takah hian Polling Station vote nei (electors) tamna ber chu Cherhlun-I niin electors 922 an awm a, vote nei tlem ber chu New Kawnpui an ni a, electors 56 an awm a ni.
Draft Roll-a hming chuang, electors 15443 zingah hian Draft roll a hming chuang lo emaw, siamthat duh emaw nei tan July ni 4, 2026 atanga ni August ni 4, 2026 thleng Claims & Objection period hawn a ni a. Hemi hun chhung hian roll-a inthunthar duh leh siamthat ngai neite chuan BLO te hnenah Form lak chhuah tur niin an henah submit leh tur a ni.
Final Electoral Roll hi September ni 6, 2026 ah tlangzarh tura ruahman a ni.
Tags
News