Lunglei DDMA Zonal Officer hovin Ṭawipui South Esther Hotel bul NH-54/2-a lei min chungchanga hma lak dan tur enfiah a niLunglei DDMA Zonal Officer hovin Ṭawipui South Esther Hotel bul NH-54/2-a lei min chungchanga hma lak dan tur enfiah a ni

Hnahthial Post | July 14, 2026, Lunglei: Nizan dar 11 vel aṭanga tukin zingkar thlenga Ṭawipui South hmar lam Esther Hotel bula lei tawlhin in 3 leh dawrte hnawl a, National Highway-54/2 kawngpui a hnawh pin avangin Lunglei District Disaster Management Authority (DDMA) aṭangin Zonal Officer Pi Grace Lalremdiki Sailo hovin joint inspection team chuan vawiin khan hemi chungchanga hma lak dan tur a hmunah an enfiah.

Inspection team-ah hian Geology & Mining (G&M) Department, Lungleia Assistant Controller of Mines Er Lalnunsiama Fanai, ABCI General Manager Pu Akhilesh Singh leh official dangte, Ṭawipui South Village Council (VC) leh Young Mizo Association (YMA) ai awhte, DDMA Quick Response Team (QRT) member-te leh Police ai awhte an tel a. Lei min dan leh min belh thei a la awm leh awm loh te, lirthei kal theiha kawngpui titlang tura hma lak dan tur te en hovin, leilung a ngheh tawk loh avangin leh lung leh lei a la tlak belh reng avangin mihring leh khawl tan him lo thei venthawn thilah leivung paih fai hna chu vawiin lamah chuan thawh rih loh mai ni se, tih a ni.

Inspection team hian lei tawlh vanga in leh lo chhiat tawk chhungkuate tlawh nghalin, sawrkar aṭanga ṭanpuina leh chhawmdawlna awm theite ruahmansakin, an bawhzuisak nghal a. Khualzin tangkhangte ei siamsakna leh senso dang phuhruk nan Lunglei DDMA aṭangin pawisa fai cheng sing hnih chu Ṭawipui South VC leh YMA te kutah an hlan nghal bawk.

Lunglei District thuneitute chuan lei min tuartute chhawmdawl kawngah te, mipui himna tur leh kawngpui tihtlang leh thuai a nih theih nan te hma la nghalin, thil ṭul hrang hrang rang taka bawhzui a nih theih nan ruahmanna siamin, an vil reng a. Inspection team-in leivung paih fai a nih hmain lung lian leh nghet lo zual chu hal darh phawt ni se tia an rawt angin, Lunglei DDMA Chairperson Pi Navneet Man chuan July ni 15, 2026 (Nilaini)-ah Assistant Controller of Mines, Geology & Mining, Lunglei kaihhruaina hnuaiah G&M Department leh Lunglei DDMA Quick Response Team te'n lung hi hal darh turin vawiin tlai khan thupek a chhuah nghal bawk.

Ṭawipui South-a lei tawlhin NH-54/2 kawngpui a hnawh pin hi lirthei kal theiha tihtlang a nih hun tur sawi lawk theih a la nih rih loh avangin Lunglei DDMA hotute chuan khualzinte fimkhur tur leh ṭul lova hun leh tha sen ral a nih loh nan he lai pal tlang tura zin chhuak rih lo turin mipuite an ngen.