Mizoram State Project Monitoring Committee-in EMRS Tlungvel sak hnathawh kal mek endik

Hnahthial Post | July 20, 2026, Aizawl: Ni 17July,2026 (Zirtawp) khan Mizoram State Project Monitoring Committee, Inspecting Team ten Eklavya Residential School, Tlungvel sak hna kal mek chu an endik.

Eklavya Model Residential School,Tlungvel hi Ministry of Tribal Affairs hnuaiah hmun kilkhawr zawk a mi, Schedule Tribe (Middle leh High School level) ten National Standard zirna tha, a thlawna an hmuh theihna tur, facility hrang hrang awmna, tender amount Rs 24.00 crore, agreement amount Rs. 23.3361 crore-a VRS Construction, Zonuam,Aizawl ten a sak hna an thawh mek chu MSPMC chuan an endik a. A hna zawh hun tura ruat ni 20 December 2021 a an zawh loh avangin hun pawhsei a nih hnu a hna zawh hun 21 December, 2024 a nichung pawha tun thlenga la zawh loh leh nasa taka tih khawtlai a nih chhante a hmun ah an endik a. A hun taka zawh loh a nih vang hian zirlaite tan harsatna lian tak thlentu a nih thu sawi a ni.

Mizoram State Project Monitoring Committee,Inspecting Team hian ni 7.6.2024 khan EMRS,Tlungvel sak hnathawh component hrang hrang hi Plan anga sak a ni em tih uluk takin a lo endik tawh a. MSPMC-in a tlawh tum hian hna hi 55% zawh tawh niin contractor hnenah hian sum vaibelchhe 15.94 pek a nih tawh thu dawn a ni bawk. MSPMC Team hian EMRS Tlungvel component hrang hrangah hian duhthusam lo leh siam that dan turah rawtna engemaw zat a lo siam tawh a. Chung chu a taka zawm a nih leh nih loh uluk takin an endik bawk a. Hna thawh zawh loh leh thawh kim loh bakah hna thawh tha lo leh pawm tlak loh a tam hle tih an tarlang a. Hmanrua a tha tawk em tih leh Concrete quality thlengin an test leh vek a ni. MSPMC chuan EMRS Tlungvel hi tangkai taka chhawr theih tura zawh fel a nih thuai theih nan hma a la zel dawn tih an sawi bawk a ni.

EMRS Tlungvel, Follow-up inspection-ah hian MSPMC Members- Arch. George Lalzuia, Er. Sanghrima Chongthu, Er. H. Laldintluanga, Pu Vannunmawia,PS to Vice Chairman, Pi Vanchhungi, Task Force, Er. Remlalmuanpuia, PA to Vice Chairman te an kal a. EMRS Society aiawh Pu Joseph Vanlalruata, AE, Pu Lalruatsanga, JE leh Pu Zodingliana Ralte, Office Assistant bakah PWD Quality Control, Research & Dev. Division atangin Pu V. Lalremruata, Pu Lalbiaknunga, Lab. Technicians leh Lab. Assistant 2 te bakah contractor te an tel a. MSPMC Inspecting Team te hi Tlungvel VC, Joint YMA, MHIP hruaitu ten lo tawiawmin Pu F. Lalhrezuala, Principal,EMRS leh staff ten an lo dawngsawng a ni.