Hnahthial Post | Aug 2, 2026, Hnahthial: Kar kalta Zirtawpni (31 July) khan Govt. Hnahthial College Auditorium-ah South Tuipui Bialtu MLA, Pu Jeje Lalpekhlua chuan Government Hnahthial College zirlai pass chhuakte thlahna leh zirlai lut tharte lawmna- 'Graduation Day cum Freshers' Social' ah khuallian niin hun a hmanpui. Kumin MZU under graduate result chhuakah Govt Hnahthial College-a zirlai zawng zawngte chu pass-in, Mizo Department, H. Lalchhanhima chuan Mizoram pumah palina (Top 4) a hauh bawk a ni.
Khuallian chuan Mizoram University (MZU) in under graduate result a tihchhuah takah Govt. Hnahthial College-in result tha tak an hmu thei chu zirtirtute leh zirlai naupangte thawhrim leh inpekna zar a nih thu a sawiin hmasawnna nasa zawk nei tura theihtawp chhuah chhunzawm turin pass chhuakte chu a chah a. An kal zelna turah duhsakna hlanin ram leh khawtlang tana theihtawp chhuah chunga lehkhazir chhunzawm zel tur leh aia upate zahna lantir fo thin turin a chah a ni.
He hunah hian Govt. Hnahthial College Principal, Pu Lalsiamthanga chuan inlawmna thu sawiin zirlai pass chhuakte chawimawina hun hman nghal a ni bawk.
Govt Hnahthial College-ah hian tun dinhmunah Department pasarih (7) - Mizo, Economics, English, Education, Political Science, History, Geography a awm a. Zirlai 128 awm mekin kumin MZU UnderGraduate result chhuakah khan za a za (100%) pass an nei a, zirlai thiam thei leh harsa deuhte free admission tihsak pathum an nei mek bawk.
Tags
News