Lungleiah Project LEAP hnuaia vohbikte tana hma lakna kal mek leh hmachhawpte sawi ho a ni

Hnahthial Post | Sep 8, 2026, Hnahthial: Vawiin khan Lunglei District Bawrhsap Pi Navneet Mann hovin a hna thawh pindanah Lunglei District-a vohbik (Persons with Disabilities – PwD)-te chawi kanna tur hma lakna, Project LEAP (Lunglei's Empowerment for Access and Equity for all Persons) hnuaia hma lakna kal mek leh hmachhawpte sawi ho a ni.

He ṭhut khawmah hian DC Office-a officer-te, Health & Family Welfare, Social Welfare leh I&PR official-te leh BDO te an tel a. Project LEAP hnuaia hma lakna hrang hrang leh Lunglei District chhung bial (cluster) hrang hranga vohbikte hriselna dinhmun endikna (health assessment camp) buatsaih tawh dan te thlir ho niin, kumin 2026 September – December inkar chhunga hma lak dan tur ruahmanna hrang hrang sawi ho a ni.

Lunglei District-a vohbik (PwD)-te dinhmun zir chianna (survey) kalpui tawhah PwD 1,414 chhinchhiah niin, he'ng vohbikte tan hian hmun hrang hrangah hriselna dinhmun endikna buatsaih a ni a. Vohbik 867 endik tawh zingah 437 chu Unique Disability Identity (UDID) siamsak tawh niin, siam hmabak 430 a la awm a. UDID la siamsak lohte hi Aadhaar leh phone number inthlun zawm fuh loh vang leh inbiak pawh harsat vang te niin, a rang lama ching fel turin hma lak ni se, tih a ni.

PwD la chhinchhiah lohte zawng chhuak turin September thla chhungin in tina kal chilha zir chianna leh inchhiarna (survey) kalpui leh tum niin, chhinchhiah sa la endik lohte leh chhinchhiah belhte tan health assessment camp buatsaih chhunzawm tum a ni a. Health assessment camp hi September thla chhungin Lunglei khawpui chhungah bul ṭanin, October – December chhungin block tina khaw hrang hrangah buatsaih leh ni se, tih a ni a. Kumin chhungin ALIMCO te nen ṭang kawpa puihna hmanrua (assistive device) sem leh dan tur ruahman ni se tih niin, naupang a bika enkawl ngai (Children with Special Needs – CwSN)-te zir chianna kalpui dan tur leh an tana hma lak dan tur hrang hrangte sawi ho a ni bawk.