Hnahthial Post | Sept 4, 2026, Aizawl: September ni 3, 2026-a Secretary, Ministry of Social Justice & Empowerment, Government of India kaihhruaia thukhawm chuan India ram puma ruihhlo dona -National Action Plan for Drug Demand Reduction (NAPDDR) atana State zawng zawng zinga hma la tha ber (pakhatna) atan Mizoram chu an puang.
Ruihhlo hmansual kan rama lo hluar zel tur venna atan Central sorkar chuan State zawng zawngin kan kalpui tur National Action Plan for Drug Demand Reduction (NAPDDR) chu a duang a. He NAPDDR atan hian Mizoramah chuan Social Welfare, Women & Child Development Department, Govt. of Mizoram hi Nodal Department a ni. NAPDDR in a tum tlangpui te chu ruihhlo ti mek ten damna kawng an zawhna tura hmalak te, enkawlna ṭha an dawn theihna tura treatment centre-a dah luh te, ruihhlo ngai enkawlnaa thawkte tha tichak tura kawng hrang hranga zirtir te a ni a. Ruihhlo la ti ve lo naupang leh ṭhalaite hnena uluk taka zirtirna pek (Awareness) hi a ngaipawimawh hle bawk a ni.
Kohhran leh tlawmngai pawl hrang hrangte nena thawk hovin sawrkar hma a la mek a. Hmeichhia leh naupangte ruihhlo laka an lo him zel theihna turin an zingah theihtawpa hma lak a ni bawk.
Hetianga hmalakna tur hrang hrang hi State Level ah a changtu Social Welfare Minister Pi Lalrinpuii hova uluk taka ngaihtuah leh remruat ṭhin a ni a. District Level ah DC tinten an thawk ṭha hle bawk a, Block Level thlengin hmalakna hi a kal tawh a ni. Ministry ah rang taka hmalakna report thehluh nghal ṭhin a ni a. Hetianga hmalakna ah hian State bakah District te pawh an ṭang hle a, hetianga lungrual taka thawhhona leh thawh rim rah hi India Sorkar laipuia Ministry thuneitute pawhin an hmuh hmaih lo a ni.
NAPDDR hnuaiah hian District zawng zawnga ruihhlo dona atana hmalakna tura central sorkarin a ruahman Nasha Mukt Bharat Abhiyaan (NMBA) chu District tinah kalpui mek a ni bawk a. District tina Deputy Commissioner te chu NMBA ah hian Chairman an ni. District hnathawh lo enpui turin Chief Secretary kaihhruaina hnuaiah ‘State Level Steering & Monitoring Committee on Drug Demand Reduction’ chu a awm bawk a. District tinin ruihhlo dona tana chak zawka hma an lak theihna turin District tina Deputy Commissioner te kaihhruaina hnuaiah ‘District Level Committee on Drug Demand Reduction’ din niin, ‘Block Level Committee on Drug Demand Reduction’ chu BDO kaihhruaina hnuaiah din a ni a ni bawk a; nasa zawk leh chak lehzuala hmalak tum mek a ni.
Ruihhlo Dona kawngah Kohhran leh tlawmngai pawlten sawrkar hmalaknate nasa taka puiin, an thawhhona zarah Mizorama ruihhlo hluar zel tur hi dan mek a ni chho chu Social Welfare, Women & Child Development Department chuan lawmawm a ti hle a ni.
Tags
News