Hnahthial Post | Sept 4, 2026 Aizawl: Mizoram Information Service (MIS) Officer thar, Batch of 2026, Orientation and Exposure Programme nei mekte chuan nimin (3th Sept) khan Mizoram Larsap General (Dr) Vijay Kumar Singh, PVSM, AVSM, YSM (Retd) chu Lok Bhavan, Aizawlah hmuin an kawm.
MIS officer tharte a kawmnaah Larsap General (Dr) Vijay Kumar Singh chuan tunlai khawvel thu thar hriat zung zung theihna hunah social media-in mipui nun a luah hneh thu leh thu dik leh rintlak puanzar a pawimawh thu sawiin, MIS officer tharte chu thu belhchian dawl mipuite hnena thlen leh zirtirna pek kawnga pawimawh tak an nih avangin fimkhur taka hna thawk ṭhin turin a chah a. Khawvel hmasawn zel chuan inbiakpawhna lamah pawh chak taka danglamna a thlen thu sawiin, Sawrkar thu chhuah, scheme, project leh programme pawimawh hrang hrang puanzar leh zirtir kawngah rilru fim tak pu chunga hma lak a ngaih thu a sawi a. Mipui rilru sukthlek hruai sual tumna ven leh ngaihtuahna dik tuh kawngah ṭanlak a ngai hle a ni, a ti bawk.
Larsap chuan MIS officer tharte chu mipui nena inthlunzawmna tha siam ngaipawimawh tura chahin, ngaihtuahna thar leh danglamna thlen thei nih tum turte, rilru fim pu tur leh thil thar zir duhna neia intuaihriama tawng hrang hrang thiam tum turtein a chah a. Hawiher tih zauh a pawimawh thu sawiin, midangte nena inkawmna leh sawi hona kaltlangin hmasawnna a awm thin a ni, a ti. Mipui tana rawngbawl an ni tih hre reng chunga hna thawk tura chahin, thiamna hrang hrang an neihte chu Mizoram tana tangkai taka an hman chhuah theih nan duhsakna a hlan a ni.
Tags
News