Source: Hillsgate
Tunlai khawvelah chuan Zirna In tha tak tak a lut tur chuan Entrance hmachhawn a ngai vek tawh ti ila kan ti sual awm love. Heng entrance exam hmang hian Institution-te chuan an institution-a luh tum zirlaite chu an hriatna zau leh zau loh te, an institution-a lut tlak an nih leh nih loh te an enchhin thin.
Hetiang bawk hian UPSC leh State Public Service hrang hrangte hian candidate tam tak atanga a tling leh thiamte an thurchhuah theih nan Exam hautak tak an buatsaih thin a. Heng exam hautak tak paltlangte hi chu mithiam leh tling tawk taka ngaih an ni thin.
Heng Competitive Exam leh Entrance exam hautak tak takte hmachhawn tur hian nasa taka inbuatsaih a ngai a. Exam dan phung nei hrang vek an nih hlawm avang leh, syllabus hrang hrang nei an nih avangin inbuatsaih dan thiam loh chuan nasa taka zir chung pawhatlin loh theihna vek an ni hlawm.
School leh University-ah chuan hriatna hmanga pass theih a nih laiin Competitive Exam dangah chuan hriatna ringawt a tawk zo lo thin a. Mihring mizia, rilru hriam leh hriam loh leh finvar-ahte nasa takin a innghat a ni. Knowledge ringawta in nghat tan chuan heng Competitive exam-te hi paltlang mai mai theih a ni lo.
Mithiam ten Competitive exam hmachhawn dan tur an lo siam hi ngun takin lo zir dawn teh ang:
- Self Belief: Nangmah khan i ti thei a ni tih i inrin a ngai. I theihna zawng zawngah i beih chuan he Competition sang lutuk hi i paltlang thei a ni tih hi i ring thlap tur a ni. Rinna hian engkim a ti thei si a.
- Knowledge: Knowledge hi competitive exam paltlang thei tur chuan neih ngei ngei ngai a ni. I thil hriat chu i hrechiang em em tur a ni ringawt. A bikin mahni specialised-na subject hi kan hrechiang em em tur a ni.
- Hun vawn thiam: Competitive Exam hmachhawn tak tak tur chuan a tlem berah ni khata darkar 4 vel tak kan zir a ngai a. Rilru chak dan a inchen loh avangin a chaklo deuh phei chuan hei aia nasa a zir hi a ngai. Kan inbuatsaih tak tak lai chuan kan nitin hun hmandan tur time table fel tak siam thlap tur a ni a. Kar tin kar khat chhunga kan zir dan ennawn a, record pawh fel taka vawn thlap a, hmasawnna tur ruahmanna thar duanchhuah thin tur a ni. Subject pakhat tana kan zir hun tur, kan ennawn hun tur te ruahman thlap tur a ni.
- Thluak chak: Thluak chak tak neih hi Competitive Exam hmachhawn tur chuan a pawimawh khawp mai. Thluak chak na na na chuan zawhna khirhkhan leh mi bum thei turte a man zung zung mai thin a, chhan dan tur a ngaihtuah chhuak zung zung thin a ni. Hetiang anga thluak chak hi kan nei vek hauh lo. Mahse, thluak hi exercise lak pui tur a ni a, zawhna chi hrang hrang in zawh a, chhan thiam dan hi zir a, practice nasat hle a ngai. Hetiang lam zawhna chi hrang hrang awm theite pawh internet leh lehkhabu lam atanga dap khawm a, chhiar tam a pawimawh khawp mai.
- Sample Papers: Hei hi inbuatsaihna tha berte zinga mi a ni. Eng exam pawh hmachhawn dawn ila, exam reng reng hian zawhna kalphung bik a neih vek avangin sample paper lo zirchian hi thil tangkai vawrtawp a ni. Heng sample questions hmang hian zawhna lo kal dan tur tlanglawn deuh chu a hriat theih thin a, zawhna hmanga mi an bum thin dan thlengin a hriat lawk theih a ni. Tin, zawhna lo kal thin dan hriat lawk tawh chuan exam hall-ah pawh ngampat theih deuh. Tunlaiah chuan hetiang sample papers te lehkhabu dawr hrang hrangah a tam tawh bakah internet lamah pawh awlsam taka download mai theih tam tak a awm a ni.
Subject/Topic harsa bik
Subject emaw, engemaw topic bikah hian harsatna hi neih ve theih deuh mai a ni. Hei hi thilmak a ni lova, zirlai tamtak in an tawn fo thin a ni. A nih leh engtin nge chutiang harsatna chu i hmachhawn ang le?
Hetiang harsatna i nei a nih chuan i rilru put hmang (mindset) i thlak a ngai a ni. Zirlai tamtak chuan hetiang harsatna, thiam theih loh bik topic leh subject an neih hian stress (chauhn, hahna) an nei thin a. Chu topic/subject chu an thiam thei dawn lo/an kal tlang theilo dawn nia ngaihna an nei thin. Han chawl vang vang la, ni hnih khat emaw (a rei zawng chu eng pawh ni sela) hahdam takin han chawl la, ngaihtuahna thar nen, a bul atangin zir nawn leh thin ang che. Huphurhna nei miah lova kan zir na na na chuan thiam hun a awm nge nge thin a ni.
Heti zawng hian entirna han pe ila: Physics-ah i chak lo hle a, engtin nge i tih ang? Kha subject i ninna avanga i chauhna te, i thinrimna leh beidawnna te kha i inhneh tir dawn nge i talent tipung turin huaisen takin hmalam i pan dawn? Hmalam i pan tur a ni. I harsatna kha i paltlang ngei ngei tur a ni. Engtin nge i tih ang le? Step pathum pawimawh tak tak a awm a, hetiang harsatna i nei a nih chuan heng step-te hi han zawh chhin teh le:
1. Inspiration:
I intih phur a ngai a, chawkphurtu i mamawh a ni. Physic subject lama mi ril leh ropui tak ngaihtuah la, chumi chu i role model-ah hmang la, entawn tum tlat ang che. I model ang nih chu tum tlat la, amah ang i nih loh pawhin amah hnaih teuh ber tala awm tum rawh. Kan ngaihsan zawngte hian kan rilru chu a lo kaihruai mai mai a ni tih i hrethiam thei ang.
2. Amount of practice and learning from failures:
I role model (i entawn ber tur chu) ang ni thei turin ngawrh taka ni khat i zir khan i ni thei em? Thei lo. Vawi leh khatah i model ang kha i ni theilo. Regular taka i zir chuan engtikah emaw chuan i hriatna kawngka kha i kik hawng ngei ngei ang.
I nunah khan hlawhchhamna emaw, zah ngawih ngawihna emaw i lo tawng tawh a ni maithei. Mahse, han ngaihtuah teh.. Thomas Alva Edision khan Electric bulb a hmuhchhuah dawn khan vawi 8000 chuang zet a enchhin a, hlawhchham a inti reng reng lo. Hlawhchham Ni a awm chuan Hlawhtlin Ni pawh a awm ngei tur a ni.
3. Coach:
A pathumna leh a pawimawh ber chu nangmah zirtirtu leh kaihruaitu tur tha tak i neih a pawimawh tih hi a ni. Hetiang taka harsatna neih tawh hi chuan mahni a thiam leh mai hi a harsa em em tawh a, nangmah zirtir theitu tur in zirtirtu emaw, tuition pe theitu tur emaw i zawn vat vat a ngai a ni. Zirtirtu fing chuan i harsatna chu an hrethiam mai ang. Zirtirtu in a hrilhfiah che chu ngun takin zir zui bawk ang che. Zirlaibu/lehkhabu hi zirtirtu tha tak zawng a ni ngei mai a, mahse, chumi hman tangkai theih dan tur zirtirtu tha i neih ngei hi a pawimawh a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
