Hnahthial Post | 3rd June, 2025: Chhimtuipui lian avangin Tuipui D khuaa Pu Biakthangpuia farm, South Lungleng panna lam a mi chu chin chhiain a Sangha dil te pawh a chim pil vek a, a Vawk In leh In te chu la lo mahse a ti chhe bawk a ni. Tuipui D khuaa Lawng pawh tui lian hian engemawzat lenin a then an pil bawk a, Lawng len bo zingah hian khawl (Engine) vuah lai pakhat a tel bawk a ni. Hei bakah hian lui hnaiah Vaimim leh thlai chinna hmun hrang hrang a ti chhe nasa hle niin thu dawn a ni. Tuipui D thlanga Varṭek khuaah pawh Chhimtuipui lian hian Chenna In 10 vel chu inthiar chhuah ngaiin a chim a, Motor 2 - Truck (Ashok Leyland) leh Pick-Up a chimpil bawk niin Varṭek atanga thudawnna chuan sawiin In a chim zingah hian In pakhat chu luah zui tlak lohin a chhia niin a sawi bawk.
Varṭek khuaa Tui lianin In a chim te hi Inrinni chawhnu kha chuan Tui lian hian kam san ṭanin In chhungte chu chirhdiak leh hnawlin a hnawh nasa hlawm hle a, thenfai hnathawh niin In neitute hian an chhungte an bel rih hlawm a ni.
Tuilianin a chim motor Ashok Leyland neitu hi Theiriat lam mi niin Varṭek khuaa mi khalh lai a ni a, Pick-Up neitu hi Varṭek khua a mi a ni. Motor an dahna hi khua aṭanga hla ve deuh, Thlengang kai bulah niin Varṭek atanga ngaihven tura an zuk kal hian tui lian chuan alo chim nasat tawh avângin Thir hrui hmangin an thlung ta ringawt niin sawi a ni.
Tags
News