Hnahthial Post | July 7, 2025, New Delhi: Pu P.C. Vanlalruata, Minister, Agriculture & Farmers Welfare chu vawiin khan Indian Council of Agricultural Research (ICAR) Society Annual General Meeting( AGM) vawi 96-na ah a tel. He meeting, Bharat Ratna C. Subramaniam Auditorium, NASC Complex, PUSA, New Delhi-a neihah hian Shivraj Singh Chouhan, Hon’ble Union Minister for Agriculture & Farmers Welfare chu chairman a ni a. State/UT hrang hranga Agriculture leh a kaihhnawih Minister te, department officer te, Agriculture lama mithiam te leh loneitu pawl aiawh leh pawl hrang hrang aiawh tel a ni.
ICAR AGM-ah hian Annual Report leh Annual Accounts te pharh niin ICAR hmalakna hrang hrang leh hmasawnna te thlirho a ni a, Union Agriulture Minister-in ICAR Publication leh Products/Technologies a, state hrang hrang tanga member-ten agricultural research chungchanga an state atanga rawtna leh beiseina hrang hrang an thlen bawk.
Minister Pu PC Vanlalruata chuan Ministry of Agriculture & Farmers Welfare hnenah heng a hnuaia tarlan te hi a thlen a ni:
1. Lunglei, Champhai leh Saitual district-a Krishi Vigyan Kendra (KVK) din thuai a nih theih nana hma la turin.
2. Agriculture-a thalaite hip tura ruahmanna tha zawk siamsak tur leh hemi atan hian ICAR-in skill development leh agri-entrepreneurship programme duan pui tur te, technology leh innovation hub din pui tur te, start-up incubation support pe tur te leh thalaite tana sustainable farming model, tunlai dinhmun nena inmil siamsak turin.
3. Mizoram sik leh sa leh a ram leilung nena inmil tlang rama chin tur buh chi tha (high yielding upland paddy) siam chhuak tura hma la turin.
4. Mizoramin thlai chi tha zawk kan neih theih nan ICAR-in hma lak pui turin.
5. National Mission on Oilseeds - Tree-borne Oilseeds hnuaiah FY 2024-2025 Mizoram Sawrkar chuan Tung (vernicia fordii) chin a tharthawh leh ta a. Tung chungchangah ICAR-in research neihsak tur leh a chingtu ten tam zawk leh quality tha zawk an thar theih nan Package of Practices duan sak turin.
6. Mizorama rawthing (bambusa tulda) tam mek avanga loneitute leh mipui harsatnate sukiang tura ICAR-in thiamna hrang hrang hmanga pui tur leh central sawrkar in special financial assistance ruahmansak turin.
Heng bakah hian Minister hian Union Minister for Agriculture & Farmers Welfare hnenah College of Horticulture tihchangtlun nana mamawh hrang hrangte leh Mamit District-a Wet Rice Cultivation (WRC) nasa zawka kalpui a ni theih nana hma lak sak turin a ngen bawk a ni.
Minister hian naktuk hian Delhi-ah cham chhunzawmin Union Minister for Agriculture & Farmers Welfare a hmu ang a, Mizoram mamawhte a thlen ang.
Tags
News