Hnahthial Post | July 10, 2025, Lunglei: Vawiin khan Lunglei South bialtu MLA Pu Lalramliana Papuia chuan a bial chhung, Theiriata National Highway-54A kawng laih zauh hna thawh avanga Sethlun aṭanga Theiriat panna kawng chung PWD Road min bal ta avanga lirthei leh mihring kal theih lohva awm mek chu a hmunah kalin a enfiah a. Deputy Commissioner (DC), Disaster Management & Rehabilitation (DM&R), Public Works Department (PWD), Geology & Mining (G&M), Public Health Engineering Department (PHED) leh NHIDCL (National Highways & Infrastructure Development Corporation Limited) ai awhte bakah, LMC Ward No. X Councillor leh Theiriat khawtlang hruaitute'n an ṭawiawm.
Pu Lalramliana Papuia hova kawng chhiat dan dinhmun en ho a nih hnuah Govt High School, Theiriatah PWD Road kawng chhe ta siam ṭhatna tur leh NH-54A kawngpui laih zauh hna thawh zelna tura ruahmanna leh hma lak dan tur te sawi ho nghal a ni a. Thuneitu sang zawka thlen turin ruahmanna siam a ni bawk.
PWD hotute chuan NHIDCL kawng laih zauh hna thawh avanga an kawng enkawl lirthei kal theih lohva awm chu a chhak lama kawng laih zauh belh dan turah ruahmanna an siam thu leh NHIDCL chu a mawh phurtu an nih angin an hnenah hma la tura hriattirna lehkha an pek tawh thu sawiin, Department hotu sangte hnenah pawh an thlen tawh thu an sawi a. Geology & Mining lam hotute chuan Theiriat khaw chhunga NH kawng laih zauh hna thawh mekna lai chu lei nghet lo, Red Zone-a awm a nih thu leh tuna an laih bak la chhunzawm zel tur thlengin zir chian ṭul nia an hriat thu an sawi a. PHED hotute chuan tui peknaah tun dinhmunah chuan harsatna lian an tawh rih loh thu sawiin, Govt Middle School Theiriat bula tui dah khawlna tanky chu hmun him lama a thar siam a nih loh erawh chuan ṭhalah tui semah harsatna an tawk thei dawna a lan thu an sawi.
MLA Pu Lalramliana Papuia chuan Theiriat khaw chhunga kawng laih zauh hna thawh mekna chu Satellite Survey Report thlalaka a lan danin lei nghet lo lai a nih avanga mipuite tana harsatna thlen thei a nih dan te DM&R Minister hnenah a thlen tawh thu sawiin, fur zawha hna chhunzawm leh hmain DC leh DM&R Lunglei te hma laknain, PWD, G&M, PHED leh NHIDCL te nen leilung dinhmun zir chian leh phawt a, sawrkar thuneitu sang zawkah report thlen tura ruahmanna siam ni se, a ti a. Theiriat panna kawng chung min chhe ta chu a theih dan dana lirthei kal leh theih tura approach road kawng dang zawn dan tur ngaihtuahpui turin PWD hotute a ngen a. Tui semna kawnga harsatna awm thei chin fel dan turah pawh PHED lam chu hma lo la tura chahin, a theih anga amah pawhin a bawh zui tur thu a sawi bawk.
NHIDCL lam chuan lei min vanga kawng ping ṭhinah a then faina tur JCB pahnih an inchhawp thu leh theih tawpa kawng then fai hna leh lirthei veivakte ṭanpui hna an thawh ṭhin thu an sawi ve bawk.
Pu Lalramliana Papuia chuan Theiriat panna kawng chung ping mek avanga mipuite'n harsatna an tawh mekah YMA te'n kawng min lai helna atana kea kalna an siam chu NHIDCL te pawhin an theih anga a thawm ṭhatna tur ngaihtuah tura a ngenna chu NHIDCL hotute chuan an lo tum tur thu an sawi a. Kea kawng min helna siam ṭhat zelna turah Local Council hruaitute chu ruahmanna siam tura chahin, kawng chhia avanga harsatna hrang hrangah theih tawp chhuahpui zel a tum thu a sawi bawk.
Tags
News