Hnahthial Post | July 3, 2025, Hnahthial: MLALADS cheng nuai hnih dawn hmanga Hnahthial Florist Association ten Hnahthial Helipad, Rallangtlang, Electric veng-a "I Love Hnahthial" an siam chu vawiin khan Hnahthial District Bawrhsap, Pi K. Vanlalruati chuan a hawng.
Bawrhsap chuan Hnahthial khua timawi a, ti ropuitu tura - " I love Hnahthial" hawn a ni ta chu lawmawm a tih thu sawiin a hlawhtlin nana sum leh tha senga hnathawktu zawng zawngte chu fakawm a tih thu a sawi a. MLA Fund phal taka petu, Bialtu MLA, Pu Jeje Lalpekhlua hnenah lawmthu sawiin a siam hna thawktu Florist Association-te chu Hnahthial timawi a chei mawitu te an ni tiin an hmalakna te chu a ropui hle a ni a ti a. Florist Association chu hmeichhia te chawikang a tichaktu leh hmasawnna kawnga sulsutu ni zel turin a chah nghal a ni.
He thil thar ropui tak Hnahthialin an neih hi dimdawi a, mahni ta ang taka enkawl theuh turin Hnahthial mipuite chu chahin, tar chaklo zawkte leh nunaute pawn thlamuang taka an chawlh theihna, an kal chakna hmun a siam turin Hnahthial mipui zawng zawng chu a ngen a ni.
Pi Lalbiaksangi, President, Florist Association chuan he hun hi kaihruaiin Pi Rohmingthangi, Secretary, Florist Association chuan lawmthu sawiin hun a khar a ni.
"I Love Hnahthial" hi MLA fund cheng nuai hnih hmanga siam niin a thuziak siam nan hian Aluminium Composite Panel (ACP) board hman a ni a. A siam leh enkawl hna thawk tu ber Hnahthial Florist Association-te hi kum 2020 khan din niin tun dinhmunah hian member 56 vel an awm a ni.
Tags
News