Hnahthial Post | July 9, 2025, Aizawl: Mizoram Social Defence and Rehabilitation Board, Directorate of Social Welfare leh Working Committee on Ruihhlo Do-te tangkawp buatsaih, ni hnih chhung awh, midang zirtir chhawng tura ruat kohhran hmeichhia leh hmeichhe NGO-te tana ruihhlo hmansual laka inven dan inzirtirna, ‘Two Days Master Trainers’ Training on Drug Abuse Prevention for Women Church Leaders and Women Federations in Mizoram’ kharna hun chu vawiin chawhnu khan I&PR Conference Hall, Lianchhiari Run-ah neih a ni a. He hun hi Social Welfare, Women & Child Development Minister Pi Lalrinpuii chuan khuallian niin a hmanpui a ni.
Khuallian Social Welfare Minister Pi Lalrinpuii chuan ruihhlo leh a kaihhnawih hrang hrangte’n kan ram a run mek laia dam khawchhuahna tura hmeichhiate pawimawhzia sawiin, hemi chungchanga sawrkar hmalaknate a tarlang a. Ruihhlo do chu sawrkarin policy-a a neih avangin he lamah hian ke a pen nasa dawn a ni, a ti a. Kan ram hi chhan tlak a la awm avangin ruihhlo chungchang inhrilhhriatna leh ti chhin lo tura inven dan inzirtir tam a pawimawh thu sawiin, Minister chuan kalkhawmte chu an thil zirte tangkai taka hmang chhunzawm turin duhsakna a hlan a ni.
Social Welfare Director Dr. Lalhriatzuali Ralte chuan he hun hi kaihruaiin, ruihhlo ngaihna chu natna a nih thu leh he natna veitute hian tisa, thlarau leh taksa damna an mamawh thu a sawi a. Kohhran leh khawtlanga nihna pawimawh tak tak chelhtu hmeichhe kalkhawmte chu ruihhlo do kawngah nunna chan hial ngama tang ngam tur leh huaisen taka hmalam pan zel turin a chah a ni.
Ruihhlo chungchang inzirtirna hunah hian kohhran leh hmeichhe pawl hrang hrang – Mara Chano Py (MCHP), Seventh Day Adventist, UPC (Mizoram), MHIP General Headquarters, Evangelical Church of Maraland, Central Kohhran Hmeichhia, Mizoram Baptist Kohhran Hmeichhe Pawl, UPC (NEI), Salvation Army leh Lai Women Association – aiawhte telin, pawl hmalakna, harsatna tawh leh hmachhawpte an sawi a. Ruihhlo do kawnga an hmalakna puih nan inkaihhruaina bu leh sum fai hlan an ni a. Pi Lalrinhlui Sailo, Social Welfare Officer on Special Duty-in lawmthu sawiin he hun hi a khar a ni.
Tags
News