Hnahthial Post | August 21, 2025, Hnahthial: Vawiin khan Hnahthial DC Meeting Hall-ah Addl. DC, Pu Zothanmawia Khiangte kaihhruaiin District Consultative Committee (DCC), District Level Review Committee (DLRC) leh District Level Security Committee (DLSC) thutkhawmna neih a ni a. Pu R. Lalmalsawma, Lead District Manager, Lead Bank Office, Lunglei chuan April - June 2025 quarter chhunga DCC,DLRC & DLSC hnuaia thlirlet turte chu chhawp chhuakin tan lak ngaihnate sawi ho nghal a ni.
Thutkhawmnaah hian KYC leh social security Scheme lamah bank-te hmalakna chu tha thawkhat viau mah se tan lak lehzual a tul thu tarlan a ni a. LDM chuan Bank account hawng duhte tan zero balance-in account a hawn theih thu mipuiten hria se a duh thu sawiin bank-te pawh lo phalloh sak mai mai lo turin a chah a. Mipui tam thei ang berin PMSBY leh PMJJBY insurance scheme leh APY scheme te hi lo hmelhriat in lo ti ve ngei se a duh thu a sawi bawk.
Loan rulh that loh, Non-Peforming Assets (NPA) chu a tamna ber, MSME(PS) ah pawh 3.72% chiah a nih thu tarlan niin a tha thawkhat viau a ngaih a ni a. Chutih rual chuan Addl. DC chuan NPA neih hlauh vang ngawtin sawrkar scheme hnuaia loan-te chu pek tim lo tura bank hotute chu chahin bank-te chu sawrkar scheme hrang hrang hnuaia loan lak tumte tan inhawng taka awm tur leh a hnual zawnga lo sawipui lo turin a chah bawk a ni.
Bank in deposit a hmuh atanga loan atana a pek chhuah zat tehna, CD ratio chu bank awm zawng zawng chawh rualin 67.48% a ni a. SBI chuan 60% an phak loh deuh avangin tan la lehzual tura chah nghal an ni. Financial Literacy camp pawh tun quarter chhung khan SBI Hnahthial, MRB Hnahthial, MRB Pangzawl, MRB S.Vanlaiphai leh MCAB Hnahthial ah te vawi thum (3) theuh neih a ni.
Lead Bank Manager chuan zirlaite tan Education loan tha tak a awm thu tarlangin buaipui a harsa tih vang ringawta bawhzui peih lo thin lo turin mipuite chu a ngen a. A awlsam ringawt chu interest-te a san thin avangin mipuite'n an tana tha tur loan leh thil dang dangte chu uluk taka ngaihven thin turin a chah bawk.
Thutkhawmnaah hian Bank hotute, Line Department aiawhte bakah NGO aiawhte an tel a ni.
Tags
News