Sports Minister-in Grassroots Sports Development Programme (GSDP) hawng

Hnahthial Post | August 21, 2025, Aizawl: Sports & Youth Services Minister, Mizoram State Sports Council (MSSC) President ni bawk Pu Lalnghinglova Hmar chuan vawiin khan Ramhlun Indoor stadium-ah Grassroots Sports Development Programme (GSDP) a hawng.

He hun puala inkhawm buatsaihah Sports Minister Pu lalnghinglova chuan infiamna tihhmasawn nana innghahna pawimawh ber chu Grassroots Sports hi a ni, a ti a. Naupang an nih lai atanga uluk tak leh mumal taka, hmathlir fel tak neia kaihhruaina nen kan inzirtir chuan tun ai hian sports lamah kan thangduang thei dawn a ni a ti a. He programme hlawhtlin theihna tura theihtawp chhuahtu leh thahnemngaitu School Education Minister Dr Vanlalthlana leh Samagra Siksha Mizoram hotute, Mizoram State Sports Council leh Sports discipline hrang hrang hruaitute chungah lawmthua sawi a ni.

Sports Minister chuan naupangte zirtirtu tur Trainer leh Assistant trainer te fuihna thu sawi mbawkin punctuality (a hun taka thil tih) ngai pawimawh turin a chah a, a hun taka thil kan tih chat chat lpoh chuan inthlahdah a awl a, nauoangte discipline in a tuar thin bawk a ni a ti a. An hna pawimawhzia hria a inthlahdah lo tura chahin kohhran leh khawtlang programme in an hnathawh tibuai lo se a duh thu a sawi a, khawvel pum huapa infiamnaah India ram a la hnufual laiin India ram chhungah National level sports-ah Mizoram kan la hnufual lehzual em em chu sports kan tuipui ngaihtuahin a zahthlak a, a bulthum atanga bulk an tan a hma kan lak a tul ni a kan hriat vangin he programme hi kan kalpui a ni a ti a. An zirtir chhuah naupangte chu naupang dangte aia thiam bik an nih leh chhinchhiah awl bik an nih loh chuan an hlawhchham tihna a ni dawn, tiin thahnemngai leh theihtawp chhuah turin a chah a, an zirtir naupangte an puitlin hunah National Games ah hlawhtlinna kan chan ngei a beisei thu sawiin, Olympic 2036 ah Mizo hming ti thatu tur chherchhuak ngei turin a chah a ni.

Dr. Vanlalthlana, Education Minister leh Pu Lalnghinglova Hmar, Sports Minister te hriatpuina-in January ni 13, 2025 khan Mizoram State Sports Council (MSSC) leh Samagra Shiksha Mizoram (SSM) te chuan Memorandum of Understanding (MoU) an ziak a. He MoU hmang hian Grassroots Sports Development Programme (GSDP) chu Mizoram hmun hrang hrangah kum 2025-2026 chhungin kalpui tum niin, kumin september thla atanga chhiar tanin thla ruk chhung kal pui a ni ang. Zirlai naupang kum 6 – 14 inkarte inkarte infiamna nihphung leh bul thut inzirtirna hmun tur a ni.

India ramin Olympic 2036 thlen tumin hma a la mek a, chumi thlir chung chuan Mizoram sawrkar flagship programme ‘The Mizoram Bana Kaih (Handholding) Policy 2024’ hnuaiah ‘Empowering Mizoram Sports (EMS)’ kalpui a ni a. Olympic 2036-a Mizoram-in India ram aiawh tur infiammi tam thei ang ber a chher chhuah theihna tura a hma lak mekna nen inhne rem takin GSDP hi kalpui tur a ni.

He programme hi sikul naupangte zirlai pangngai tibuai lo tura kalpui tur a ni a. Kar khatah nithum aia tlem lo traning an nei thin ang a, sikul chawlhah uar zawkin Training hi an nei thin ang. Naupang ten thla 6 chhungin minute 9,000 bawr vel training nei tur a beisei a ni.

Training neih chhung hian Sports mai bakah, Mizo nun zemaw inzirtirna te, ruihhlo leh zuk leh hmuam that loh zia te inzirtir tel tur a beisei an ni a. Hei bakah hian an phak tawk theuhah vantlang tana tangkai, hmun hma tihfai leh enkawl te pawh bilh tel tur a beisei an ni.

Distict tinah District Level Management Board, District Project Coodinator Samagra Shiksha Chairman na hnuaiah din a ni a. He Committee ah hian District tina Sports Association te an center neih dan ang zelin Commitee ah hian an tel bawk. State Level ah MSSC ah GSDP Cell din a ni bawk.

GSDP hnuaia Sports Discipline thlan dan hi Olympic Vision Sports leh Popular Sports en kawp chunga thlan a ni a. Kum 2025-2026 chhungina hnuaia tarlan Sports discipline pakua (9)-ah hian hma lak a ni ang.

Archery, Badminton, Boxing, Football, Hockey, Judo, Taekwondo, Weightlifting leh Wrestling Mizoram hmun hrangah Centre 46 ruahman a ni a, heng center thlanna ah hian State Level Sports Association te rawn niin, anni’n Talent awmna ni a an hriat khuaah Center te hi dah a ni. Center tin te hian sawrkar sikul nghen chhan nei zel tur a ruahman a ni.

Center hrang hrang awmna khua leh Sports Discipline awm dan tur a hnuaiah hian tarlan a ni.

Archery – Vairengte, East Lungdar (Center 2)

Badminton – Durtlang, Hnahthial, Mamit, Lunglei (Center 4)

Boxing – Champhai, Khawzawl, Saitual, Hnahthial, Kolasib, Mamit (Center 6)

Football – Darlawn, Farkawn, Tipa, Chawnhu, Haulawng, Hnahthial, Khawhai, East Lungdar, Phullen,

Vairengte, Tuidam (Center 11)

Hockey – Sihphir, Lunglei, Hnahthial, Kolasib, Mamit, Siaha (Center 6)

Judo – Tuirial, Sesawng, Bunghmun, Kolasib (Center 4)

Taekwondo – Thenzawl, Champhai, Lawngtlai, Kawnpui (Center 4)

Weightlifting – Aizawl Bethlehem Veng, Kolasib, Khawzawl, Serchhip, Champhai (Center 5)

Wrestling – Tachhip, Serchhip, East Lungdar, Mamit (Center 4)

Trainer 46 leh Asst Trainer 46 (Center tin atan pakhat ve ve) lak an ni a, anni hi GSDP hnuaia Sports Discipline awm State Level Sports Association aiawh leh GSDP Cell, MSSC te telna Interview Board member ten lungrual tak an thlan te an ni.

Sports lama mithiam bik thlanchhuah ‘Resource Person” ten trainer leh tAssistant trainer te hi vawiin leh naktuk (nihnih chhung) hian training an pe ang.

Vawiin programme hi MSSC Secretary Pu Henry C. Lalrawnkima’n a kaihruai a, GSDP Programme Co-ordinator Pu Hmingthansanga’n report a pe a ni. He hun hi School Education Director Pi Angela Zothanpuii, Samagra Siksha Mizoram hotute, MSSC officialte leh Sports discipline thlanchhuah chi hrang hrang hotuten an telpui bawk a ni.