Hnahthial Post | August 15, 2025, Hnahthial: India ramin zalenna a sual chhuah champha vawi 79-na chu vawiin khan Hnahthial District Turf Ground-ah ropui taka lawm a ni a. Khuallian, Pu F.Rodingliana, Minister of State for Power & Electricity leh Commerce & Industries Department chuan India Hnam Puanzar pawt pharhin Parade contingent 14 te chibai chu a chhang let a ni.
Khuallian chuan thuchah sawiin Independence Day vawi 79-na puala Hnahthial District mipui rawn kalkhawm zawng zawngte chu duhsakna chibai a buk a. Mahni a ro in rel theih pawimawhna hriat thar lehna ni atana hman ni se a duh thu sawiin ram mai ni lo, mimal tin te mahni ke a ding thei turin independent rilru kan put a tul thu a sawi a ni. India ramin hma a sawn rualin Hnahthial District chuan kawng hrang hrangah hmasawnna hmel a hmuh ve thu a sawi bawk.
District chhunga hmasawnna awm theih nana sawrkar department hrang hrang hmalaknate chu tarlangin Hnahthial mipuite tan DC Office-ah June, 2025 atang khan Revenue Cell din a nih tawh thu a tarlang a. House pass, LSC, Periodic Patta te leh dilna hrang hrang 500 chuang a luh tawh thu sawiin chungte chu bawhzui mek a nih thu a sawi bawk. Election Office lamah Special Summary Revision,2024 chu tluang tlaka zawh fel a nih thu leh BLO te hriat theihna tur BLO badge siam a nih tawh thu a sawi a ni.
Police hmalaknate tarlangin tun kum tir atanga July ni 31 thleng khan Heroin No.4 gram 658.62 man a nih tawh thu a tarlang a. CCTV pawh Hnahthial hmun pawimawh laiah dah tura hmalak mek a nih thu a tarlang bawk. Excise & narcotics Office ten July ni 29 thleng khan MLP Act hnuaiah case 122 an siam tawh thu tarlang bawkin heroin gram 293 leh rakzu litre 2698.685 an man tawh thu a tarlang bawk. EF&CC Department ten thin tiak 17000 chuang kui tiah an enkawl mek thu sawiin District Hospitalah khum 50 awm theihna tur District hospital sak hna thawh mek a nih thu a tarlang a ni.
MGNREGS hnuaiah job card nung 6867 an awm thu leh hna hrang hrang 364 thawh a nih tawh thute a tarlang a, SASCI Fund hmangin khaw 15-ah Library building sak vek a nih tawh thu a sawi bawk. Hei bakah hian Hnahthial mipuite mamawh em em mai, bawlhhlawh sawngbawlna tur, Solid Waste Management Center (SWMC) sakna tur hmun, Rotlang East chu Land Lease peih fel a nih tawh thu sawiin a satu tur zawn nan tender chhuah mai theih a nih tawh thu a sawi a. Ration buhfai, a buk tling ngei a nih theihna tur atan Village Council Level Vigilance Committee din fel a nih tawh thu te tarlangin Agriculture & allied sectors hnuaia hmalakna hrang hrangte chu a tarlang nghal bawk. Education Department hmalakna hrang hrangte tarlangin Govt. Hnahthial College chu Mizoram University Undergraduate result puan zingah 100% pass an neih thu a sawi a ni.
P&E hmalakna hmachhawpte tarlangin khaw 18-ah Service Connection 268 pek an tum thu te, khaw 17-ah LT line siam an tum thute leh khaw hrang hrangah 25kVA transformer leh 11kV Line siam tum mek a nih thute a tarlang bawk. Commerce & Industries hnuaiah CM Special Package dawng tura thlan chhuah mi 23 hnenah Orientation pek an nih tawh thu sawiin Handholding hnuaiah Hnahthiala RAMP Staff ten DPR 14 an siam tawh thu leh chung zinga 9-te chu Hnahthial District an nih thu a sawi a ni.
AH& Vety Department in ASF natna do tura an hmalakna hrang hrangte tarlangin Fisheries Department-in luidung sanghate an humhalh nana YMA leh NGO te an thawhpui dante a tarlang a. Child Development Project Office hnuaiah PMMVY Special Drive-in an target bituk atanga 236% chu an cover tawh thu leh Mizoram pumah pakhatna an nih thu te a tarlang a, Child Protection Unit lamah naupang 12 foster care kaltalnga enkawlna pek an ih tawh a tarlang bawk a ni.
Ram pum angina kawng tam takah hmasawnna tam tak kan neih bawk thu sawiin chungte chu Assam rifles khawpui chhung atanga sawn chhuahte, Four-Lane Vairengte to Sairang compensation avanga hmalak theih loh reng chu Chief Minister hmalakna in Forest Department-ah leh Land Owners-ah cheng vbc 1190 compensation pek an nih thute a sawi a ni.
Independence Day hmang tura kalkawm zawng zawngte chu ram leh hnam tan rinawm leh taima taka thawk tur leh hlemhletna leh mahni hmasialna dahtha a, inlungrual taka hmasawnna nei tura bei zel turin a chah a ni.
Khuallian thusawi kimchangin> https://www.hnahthialpost.com/2025/08/thusawi-pu-f-rodingliana-minister-of.html
Hnahthiala Independence Day,2025 lawmnaah hian Parade Commander chu SI, Pu Pauthanzama niin 2nd Commander chu ASI, Pu Lalmawizuala a ni a. School contingent 13 awmin NCC Contingent pakhat an awm a ni.
Khuallian chuan lawmman semna hun nei nghalin lawmman sem leh lawmman dawngtute chu:
I. Kangmei laka invenna (Fire Prevention) :
1st Prize: Muallianpui VC ( Rs. 50,000 leh citation)
2nd Prize: Hnahthial North-I VC (Rs. 30,000 leh citation)
3rd Prize: Hnahthial South-II VC (Rs. 20,000 leh citation)
Denglung leh Darzo VC te chuan consolation Prize an dawng bawk.
II. MLA Award:
i) Esther Lalawmpuii, Cherhlun ( 5th Position in MA(Education))
ii)Lalchhanchhuahi, Thingsai (10th Position in BA (History))
iii) Lalneihhlui, Tuipui D (7th Position in BSc. (Geology))
iv) R. Lalrammuanawmi, Hnahthial Venglai (8th position in MA Eco)
v) Lalchhanchhuahi, Thingsai ( 10th Position in BA History)
vi) Lalhruaitluangi Hnamte, Hnahthial Electric Veng (2nd in MA(RD))
III. DVO Award for ASF Prevention : Cherhlun Vawkvulh Association
IV. Slogon/Poster Making Competition on Stop Diarrhoea Campaign:
1st Prize: H.Lalenkawli, Class-X, Govt. Southern HS
2nd Prize: Lalrinsangi, Class-X, Govt. Southern HS
3rd Prize: C.Lalhriatsaki, Class-IX, Govt. HS
V. I-Day March Past:
1st Prize: FD Higher Secondary School
2nd Prize: Govt Model Middle School
3rd Prize: Nuchhungi English Medium School
Lawmman semna neih zawh hian hnam puanzar chibai bukna neih niin hun hi khar a ni a. Hemi zawh hian Khuallian chuan DC Bungalow-ah sawm bikte nen ‘VIP At Home’ an hmang nghal a ni.
Tags
News