Chief Minister-in Serchhip Zuanglengah changel kawr sawngbawlna hawng

Hnahthial Post | October 15, 2025, Serchhip: Vawiin khan Chief Minister Pu Lalduhoma chuan a bial Serchhipah Ministry of DoNER PM-DevINE sum hmanga, North East Centre for Technology Application and Reach (NECTAR) ten an din Changel Kawr sawngbawlna Common Facility Centre, (NECTAR Livelihood Improvement Project – A Value Chain on Utilization of Banana Pseudostem for Value-Added Products ) Zuangleng rama din chu a hawng.

Agriculture Minister Pu PC Vanlalruata leh Pu Satinder Kumar Bhalla, Secretary, NEC te chu khualzahawm a ni a, Lt. Col. Lalhmingthanga, MLA chuan Chief Minister hi a tawiawm.

A hawnna inkhawm Serchhip DC Conference Hall-a buatsaih a nih zawhah Zuangleng ramah a hmunah Chief Minister hian a tlawhzui a ni.

A hawnna inkhawmah hian thusawiin Pu Lalduhoma chuan, Zuangleng ram leh a chhehvelah hian Changel a tam a, Khumtung leh a chhehvel khuaah Balhla chingtu tam tak an awm bawk a. Hengte behchhan deuh hian NECTAR lamten Changel Kawr sawngbawlna an han din a. He laia ram nei, Changel leh Balhla kawr, paih mai mai thinten an hnawm kha sumah an chantir thei dawn ta a ni.

Minister of DoNER chungah lawmthu ka sawi a, hnathawktu NECTAR te hmalaknaah kan lawm a ni. He unit enkawltu tura thlan Implementing Agency APRINS te chu tha taka kalpui turin kan beisei dawn a, kan tum ang ngeia kan kuthnathawktute tana tangkai taka an kalpui kan duh a ni, a ti.

Pu PC Vanlalruata, Agriculture Minister pawhin thusawiin, Ministry of DoNER chungah lawmthu a sawi a. Mizoramin kan la hmelhriat ngai vak loh Changel kawr sawngbawlna Serchhip district-in kan nei ta hi ka lawm a. Mi tam takin an tangkaipui ngei ka ring a ni, a ti.

He CFC hi Changel kawr atanga hrui siamna, kuta siam paper siamna, vermicompost siamna leh savun thlakna Vegan Leather an tih mai siam chhuah theihna tura duan ni a. A buaipuitu NECTAR hi Department of Science & Technology hnuaia Autonomous Institution an ni. Zuangleng CFC enkawl tur hian APRINS Guwahati te chu thlan an ni. NECTAR hian India hmarchhakah Technology thar leh tunlai zawk hmanga thingtlang loneitute tanpuina hna an thawk nual a, Mizoramah pawh hmalakna tam tham tak an nei a ni.

Pu Paul L. Khuma, DC Serchhip chuan kal khawmte lawmna thu a sawi a, Dr. Collin Z. Renthlei, Technical Advisor, NECTAR chuan lawmthu sawiin a hawnna inkhawm a khar a ni.