Hnahthial Post | December 5, 2025, Aizawl: Vawiin khan Art & Culture (A&C) Department Lunglei, Mizo Cultural Organisation (MCO) General Headquarters Lunglei leh Mualṭhuam North Branch YMA te ṭang ho huaihawtin Mualṭhuam North GSA Playground-ah Cultural Meet buatsaih a ni a. Lunglei Municipal Council (LMC) Chairman Pu Lalzuithanga chuan Khuallian niin a hmanpui.
Khuallian Pu Lalzuithanga chuan Mizote Mizona chawi kanna kawngah Art & Culture Department-in a thawh hlawk thu leh MCO leh YMA te thawhpuia Cultural Meet huaihawt chu ṭha a tih thu a sawi a. Mizo min ti-Mizotu ber chu keimahnia Mizo nihna, Mizo culture nghet taka phuna a awm hi a ni tiin, kan hnam tih dan kalphung pangngai, kan ei zawn dan, inneih dan leh chhiat ni ṭhat nia kan inpuihbawm dan te hi kan chhawm nun zel loh chuan kan hnam hi a boral thuai ang, a ti a. Zai leh lam hi kan culture pho lanna ṭha ber a nih avangin chawi lar hi kan bat a ni tiin, ṭhalaite chu Mizoram hma lam thlira an ngaihtuahna seng tak tak tur te, ruihhlo leh a kaihhnawih laka inthiar fihlim tur te, mahni intodelh tur leh ei zawnna ngelnghet nei tura thawk rim tur te'n a fuih.
MCO Gen. Hqrs Lunglei President Pu R. Lalsangvunga chuan hun kaihhruaiin, Mizoram UPC Mualṭhuam North Bial pastor Rev. Rohmingthanga chuan hunserh a hmang a. A&C Lungleia Senior Research Officer Pu Lalmuanpuia chuan report pein, lawm thu a sawi a. Mualṭhuam North Branch YMA President Pu Lalromawia chuan thu a sawi bawk.
He hunah hian Mualṭhuam North khaw chhung aṭangin Mualṭhuam North Branch YMA, MUP, MHIP, Savidge English School leh Government Mualṭhuam North High School te an tel a. Mualṭhuam North khaw ṭhenawm aṭangin Haulawng Branch YMA leh Ramlaitui Branch YMA te pawhin hnam lam chi hrang hrang entirin an telpui bawk.
Lunglei khawpui aṭangin MCO branch hrang hrang: (1) Hauruang, (2) Venglai, (3) Zohnuai, (4) Electric Veng, leh (5) Pukpui te telin, hnam lam chi hrang hrang an entir a. Mizo Cultural Artistes’ Association (MCAA) Sub-Headquarters Lunglei te pawhin hnam lam mawi tak an entir bawk.
MCO Gen. Hqrs Lunglei hruaitu hlui fam ta Pu K. Darchhawna hla phuah chu Pukpui nula zaithiam Nl. Lalremliani'n thiam taka sain, mipuiin an hlut hle a. Mizo Idol 2025-a top 20 Tv. R. Remruatpuia leh zaithiam dang - Tv. Lalchhanhima, Nl. Pc. Lalruatpuii leh Nl. R. Lalnunfeli, Mualṭhuam North te bakah, Nl. Christina K. Lalnunpuii (Lunglei Luangmual) leh Nl. Lalduatpuii (Vanhne) te chuan thiam takin mipui an awi bawk a. Hnam lam, zai leh rimawi te nen hlung takin hun hman a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
Tags
News