Chamb Battle Honour Celebration Day vawi 54-na hman a ni

Hnahthial Post | December 5, 2025, Aizawl: Vawiin khan KV Paradise Durtlangah Ex-Fighting Fifth Association (EFFA) chuan 1971 INDO-PAK WAR-a 5 Assam Regiment-in chawimawina BATTLE HONOUR of CHHAMB a dawn lawm vawi 54 na an nei a. He hun hi Lt. Col. Clement Lalhmingthanga, MLA leh President, Mizoram Ex-Service League ni bawk chuan khuallian niin a hmanpui.

Khuallian Lt. Col. Clement Lalhmingthanga chuan he hunah hian thu sawiin, 5 Assam Regiment-in Battle of Chhamb 1971 a ram leh hnam tana an inpekna avanga chawimawina BATTLE HONOUR of CHHAMB an dawn lawmna an hmang leh thei ta chu lawmawm a tih thu a sawi a. Khuallian chuan Battle of Chhamba Pakistan thil tum kha hlawhtling ta se, India ram tana pawi tak nih theih tur a sawi a, India Armed Forces leh politics-ah pawh History pawimawh tak a nih thu sawiin hemi avang hian India Sawrkar chuan Chawimawina BATTLE HONOUR OF CHHAMB-71 a pek thu leh hemi rual hian THEATRE HONOUR OF JAMMU AND KASHMIR a pek thu a sawilang a ni.

5 Assam Regiment hian 1971 INDO-PAK-WAR tum khan CHHAMB Sector-ah Pakistan ral a do va. 191 Infantry Brigade hnuaia Battalion pali zinga pakhat a ni. Hetih hun laia Pakistan thil tum chu 5 Assam Regiment awmna hmun lak vat a beihpui thlak a, December ni 4, 1971 zana Manavartavi (tuna India leh Pakistan inrina) lui chunga Concrete lei chu a Control nghal a, chuta tang chuan a rang thei ang bera hma lam pana India sipaite inrin fel hmaa Akhnoor Bridge leh Akhnoor khua laka awhbeh nghal an tum a. Chu an tum tihlawhtling tur chuan Pakistan Sipai tam tak, 5 Assam Regiment let engemawzata tam 23 Infantry Division, 26 Tank Brigade leh Artilery tam tawk tak Support leh Jet Fighter nen chhumlo chat lo va beihpui an thlak chu 5 Assam Regiment chuan an lo dang tlat zel a.

5 Assam Regiment Officer-te huaisenna, remhriatna leh an Leadership thatnate leh an sipaite luchhum banchhum huam a an hmelma ral an do tlat avangin Pakistan thil tum chu an ti hlawhchham ta a ni.

Vawiin a Battle Honour of Chhamb 1971 lawmnaah hian 5 Assam Regiment 1971 ral do la damte leh an chhungte an tel thei a ni.