Asia rama Mixed Martial Arts inelna lian ONE Championship a hnehna chang Nazareth Lalthazuala, Sports Minister-in lawmpuina hun hmang

Hnahthial Post | December 5, 2025, Aizawl: Vawiin khan Pu Lalnghinglova Hmar, Minister of State, Sports & Youth Services Department chuan Asia rama Mixed Martial Arts inelna lian ONE Championship a hnehna chang Nazareth Lalthazuala chu lawmpuina hun MINECO a a office-ah a hmanpui.

Sports Minister Pu Lalnghinglova chuan Phuaibuang khawchhuak, Zemabawk East a cheng Nazareth-a chu Mizoram leh Mizote mai nilo, India ram piah lamah Asia aiawh ang a nih tawh thu sawiin a lawmpui tak zet tih a sawi a, "Mizote leh Mizoram mai ni lo, India ram tihmingthatu Nazareth-a ka chhuang tak zet che." a ti. Nazareth-a chu midangte tana entawntlak tak a nih thu sawiin, "Mizoramah infiamna tuipui kan intih viau laiin medal anga tehnaah kan hniam leh hle thin. Infrastructure te pawh kan nei ve zel a, mahse a talent haichhuah leh inchher lamah tan kan lak a ngai hle." tiin infiamna lamah hma kan sawn a ngaih thu a sawi bawk.

Nazareth-a hian November 28 khan Bangkok, Thailand a ONE Championship buatsaih ONE Friday Fights 135-ah Japanese fighter tha Masaki Suzuki chu second 16 chhungin a knockout a. Professional Mixed Martial Arts bikah vawi 6 inelna hmachhawn tawhin hnehna a la chang vek a, tun tum hi ONE Championship bikah a inlan vawikhatna a ni.

Sports Minister hian Nazareth-a chu MMA lamah kal tawh mahse a rem dan anga combat sport dangte pawh la khel tel tho turin a chah a, a kal zelna turah inpuih theihna a awm a nih chuan a hnena thlen zel hreh lo turin a chah a ni.

Vawiin lawmpuina hunah hian Nazareth-a hi a pa Lalhratthanga leh MISMA hruaituten an tawiawm a. Minister hian lawmpuina pawisa fai a hlan bawk a ni.