Adviser to CM (Technical) MLA Pu H Ginzalala'n khaw 27 huap tur Seling Plastic bawlhhlawh sawngbawlna hnathawh kalpui tan turin a vai liam

Hnahthial Post | December 5, 2025, Aizawl: Vawiin chawhnu dar 2:00 khan Project Management Unit leh Rural WATSAN Division, Aizawl, PHED te buatsaihin Zero Point, Seling hmuna Plastic Waste Management Unit chu hnathawh ṭan turin Pu H. Ginzalala, MLA & Adviser to Chief Minister, Mizoram chuan a vai liam a. He bawlhhlawh sawngbawlna hmun hian Thingsulthliah RD Block huam chhunga khaw 11 leh Darlawn RD Block huam chhunga khaw 16, a vaiin khaw 27 a huap dawn a. He’ng zingah hian urban area pakhat Darlawn khua a tel dawn a ni. Seling Plastic Waste Management Unit hi Swachh Bharat Mission (Grameen) hnuaia din a ni a, hnathawh hi Public Private Partnership (PPP) mode-a kalpui tur niin, a enkawl hna hi private firm Vanzel EcoSolution-te’n an thawk dawn a ni.

Hun hmanpuitu Pu H. Ginzalala chuan khawvelin a buaipui em em plastic bawlhhlawh sawngbawlna, Seling khaw ram chhunga din a ni thei leh kalpui theih a ni ta chu lawmawm a tih thu sawiin, ram faina kawnga ni chhinchhiahtlak leh mellung pawimawh tak a ni, a ti a. A huap tur khawtlang mipui zawng zawngte’n an pawimawhzia hriaa ṭangkai taka hmang tura sawmin, bawlhhlawh ṭawihthei leh thei lo thliar hran kawngah mipuiin mawhphurhna sang tak an neih dawn avangin an mawhphurhna ṭha taka hlen turin mipuite a fuih a ni.

Pu H. Ginzalala chuan sawi zawmin, Sawrkar laipui thupek zawmin Mizoram sawrkar chuan plastic bawlhhlawh sawngbawlna hmun pawimawhzia a hria a, tunah hian PHE Department hnuaia Swachh Bharat Mission Grameen (SBM-G) kaltlangin Mizoram thingtlang khaw hrang hrangte hman turin plastic bawlhhlawh sawngbawlna hmun 4-ah a kalpui mek a, Seling Plastic Waste Management Unit hi a Pangana (5) tur a ni ang, a ti a ni.

Seling PWMU hmunah hian hnathawhna khawl baling machine, shredder, conveyor belt te awm tura duan a ni a. Plastic bawlhhlawh sawngbawlna hmun a nih angin mipuite atang pawhin plastic bawlhhlawh chauh khawn tura ruahman a ni.

Flag-off programme hi Er. Lalropuia Hmar, Mission Director, Swachh Bharat Mission (Grameen) leh Director, PMU, PHED ni bawk chuan kaihruaiin, Er. C. Lalchawimawia, Sr. EE, Rural WATSAN Division, Aizawl, PHED hnen aṭangin technical report ngaihthlak a ni a. Pu Lalrinpuia, Ṭawi West Block President chuan thusawina hun a hmang bawk a ni.