Ni 2 awh tur 'Mizoram Buyer Seller Meet 2025' chu Agriculture Minister-in a hawng

Hnahthial Post | December 5, 2025, Aizawl: Vawiin khan Mizoram Agricultural Marketing Board, International Fund for Agriculture Development (IFAD) leh Mission Organic Mizoram tangkawp buatsaih, ‘Mizoram Buyer Seller Meet 2025’ chu Aijal Club-ah Pu PC Vanlalruata, Minister, Agriculture & Farmers' Welfare Department chuan khuallian niin a hawng a. Pu C.Lalsawivunga, Minister, Horticulture Department chu khual zahawm niin Pi Ramdinliani, Secretary, Agriculture & Farmers' Welfare Department chuan kalkhawmte lawmna thu a sawi. District hrang hrang atanga Agriculture Marketing Committee-te, Farmer Producer Organisation, Self Help Group, Entrepreneurs leh ram chhung leh pawn atanga sumdawng company engemaw zah he hunah hian an tel a ni.

Agriculture Minister Pu PC Vanlalruata chuan Mizorama kuthnathawktute tih hmasawn leh an dinhmun chawikan nana indawrtawnna tha siam sak an nih theih nan Mizoram Agricultural Marketing Board MAMB) chu din a nih thu sawiin, Mizorama thar chhuah Sawhthing, Aieng, Mizo Hmarchate leh Hmunphiahte pawh hmun zau zawka hralh chhuah mek zel a nih thu a sawi. Khuallian chuan MAMB hmalakna leh kuthnathawktute thawhrimnaten hlawhtlinna an hmuh theih nana pawimawh tak chu thlai thar lei chhawngtu tha leh rintlak neih a nih thu a sawi a. Chutiang ‘Buyer’ tha kan neih theih nan Buyer Seller Meet hi buatsaih a nih thu leh indawrtawnna tha a hrin chhuah ngei a beisei thu a sawi.

Pu PC Vanlalruata chuan Aizawl chu rel hmanga thlun zawm a nih tawh avangin insumdawntawnna pawh nasa zawka kalpui theih a nih tawh thu a sawi a. Chutihrual chuan State dangte el pha leh midang aia thlai hrisel, thianghlim leh itawm zawk thar chhuak turin tan lak a pawimawh thu a sawi. Bana Kaih Scheme kaltlangin sawhthing lei nan Cheng Vbc. 137 hman a nih thu Agriculture Minister chuan tarlangin Mizoram sawhthing chu hlotur tel lo, ‘Organic’ taka enkawl a nih avangin ngaih hlut a hlawh chhoh zel a beisei thu a sawi bawk a ni.

Khual zahawm Pu C.Lalsawivunga, Horticulture Minister chuan Kuthnathawktute, thalai theihna leh thiamna nei ten eizawnna ngelnghet an neih theih nan Mizoram Sawrkar chuan Bana Kaih Scheme a kalpui mek thu a sawi a. Agriculture leh a kaihhnawih thlai leh thei, man man zawka tihral dan tur tha ruahmanna tur a ‘Buyer Seller Meet’ buatsaih a ni chu lawmawm a tih thu a sawi.

Horticulture Minister chuan Mizoram chhunga thlai thar chhuahte chu a hriselin a thianghlim bik tih a sawi a. Niti Ayog pawhin Mizoram chu ‘Ginger Capital of India’ ni theih tur khawpa tan la turin thurawn an pek thu a sawi. Mizoram hausakna hmang tangkai a, kuthnathawktute chawikanna kawnga thawktu pawimawh tak nih tum theih turin ‘Buyers’ lo kalte chu a sawm bawk a ni.

Dr. KC Lalmalsawmzauva, Adviser to Chief Minister (Hand holding) chuan kuthnathawktute tihhmasawn nan Sawrkarin kalphung an thlak danglam thu sawiin, thlai thar chhuah tam dan kawng a dap hmain a tihral dan tur tha a ngaih pawimawh hmasak tawh thu a sawi a. ‘Market First, Production Second’ tih thupui hmangin kuthnathawktute pawh hmalakpui mek zel an nih thu a sawi. Mizoram district hrang hrangah Collection Centre 65 din a nih thu Dr. KC Lalmalsawmzauva chuan tarlangin, heng hmun ahte hian Sawhthing, Mizo hmarchate, Aieng leh Hmunphiah lei khawm leh tih ralna kalpui a nih thin thu a sawi a. Kuthnathawktuten an thawh hah man dik tak an hmuh ngei theih nan indawrtawnna rintlak siam a pawimawh thu a sawi a. Inbiakremna zat atanga za zela 50 chu a man pek lawk a, a bak za zela 50 dang pawh hi thlai thar kan lei ten Collection Centre a chhuahsan hma ngeia kuthnathawktute kut a pek a pawimawh thu a tarlang bawk a ni.

Mizoram Buyer Seller Meet 2025 hawnna hun ah hian Pu Lalmalsawma Pachuau, Secretary, Planning & Programme Implementation Department chuan Mizoram Sawrkar Flagship Program Bana Kaih Scheme nihphung tlangpui tarlanna hun leh thlai thlan bik, Sawhthing, Aieng, Mizo Hmarchate leh Hmunphiah tihralna kawnga Sawrkarin tanpuina a pek dan a sawifiah a. Pi Hanisha Vaswani, Consultant, IFAD chuan Mizorama thlai leh thei tharchhuah leh man man zawka tih ral kawnga hmalak theih dan a tarlang a. Pu H.Lallianzuala, Convener, Buyer Seller Meet chuan lawmthu sawina hun a hmang bawk a ni. Vawiin Buyer Seller Meet 2025 ah hian State pawn atanga ‘Buyer’ inziaklut hi 40 bawr vel an ni a, Mizorama thar chhuah thlai, thei leh a kaihnawih chi hrang hrang phochhuahna stall 50 a awm bawk a ni.