Chief Minister-in Chuhvelah Rubber chinna hmun Zaupui panna kawng a hawng

Hnahthial Post | December 9, 2025, Aizawl: Nimin khan Chief Minister Pu Lalduhoma chuan Chuhvel Rubber chingtute zau panna kawng a hawng a, Pu Lalthansanga, Minister, Land Resources, Soil & Water Conservation chu khualzahawm a ni. Pu Lalfamkima, Dy. Speaker, Chuhvel bialtu MLA chuan Chief Minister hi a tawiawm a ni.

Chief Minister thusawi langsar zualte chu:

1. Department-in a chhinchhiah danin Mizoram Hectare 50,000 a zauah Rubber hi chin theih a, a chinna tlaka ngaih hmun thuma thena hmun khatah pawh kan la ching lo.

2. Sorkarna kan chelh hnu reiloteah khan ka Office-ah Dr. Shawar Dhanania, India Rubber Board Chairman nen kan inkawm a. Tripura state-in CM Rubber Missions an kalpui dante kan sawi dun a, Mizorama kalpui ve a that thute, a tul anga Rubber Board-in min thawhpui an inhuam thute min hrilh a. Tripura State-a an kalpui dan zirchiangtu tur mithiam ka tir thla a. Nikum December ni 16 khan Mizoram Chief Minister Rubber Missions chu kan hawng ta a ni. Ka hawn niah hian hna kan thawh tan maina tur Rs. 27.98 crore sanction-na lehkha chu NABARD atangin kan dawng nghal nghe nghe a ni.

He Missions hnuaiah hian kum 5 chhungin Hectare 11,500 a zauah Rubber chin khah vek tum kan tum dawn a ni.

3. Rubber hi hmun hniam lam mean sea level atanga meter 500 aia sang lovah a tha duh a, Hectare 1 a zauvah kung 450 vel phun theih a ni a, Department chhinchhiah danin Mizoram chhung bikah Rubber kung puitling pakhat atangin kum 1 chhungin Rubber hnai Kg 2 atanga Kg 4 thleng a thar theih a ni. Hectare 1 zauvah a tlangpuiin Kg 1000 atanga Kg 2000 vel kum khat chhungin a thar theih tihna a ni a. Tunlai market rate anga chhutin Hectare 1 a zauvah Rs.1,80,000 atanga Rs.3,60,000 vel a lakluh theih tihna a ni.

4. Rubber chin hi tlangram lo neih bansan a, eizawnna ngelnghet neih nan a tha a. Ramngaw chereu zel tur ven nan te, lei chung hang luangral tur venna atan leh tuihna humhalhna atan pawh a tangkai hle tura ngaih a ni.

5. Chief Minister’s Rubber Mission Phase-I kha nikum 2024-25 Financial Year atang khan bul tan a ni a, Mamit District leh Kolasib District chhunga cluster 24 ah, Hectare 1000 a zau huamin Rubber tiak 4,50,000 phun khah vek a ni tawh a. Phase-I hnuaiah hian Mamit District-in hectare 844 in chang a, Chuhvel khua bik hian hectare 80 in chang.

6. Kum 2025-26 Financial Year chhung hian Phase – II kalpui leh mek a ni a, Mizoram chhung District hrang hranga Hectare 2575 a zauvah Rubber tiak 11,58,750 phun chhuah leh vek tum a ni. Mamit District tan bik hectare 1316 ruahman a ni.

7. CM Rubber Mission hnuaiah hian a phun belh chauh ni lovin, a chingtute tana hamthatna - Rubber sawngbawlna hmanrua te, Plantation link road bakah marketing thlenga ngaihtuahsak tur an ni.

8. Huan panna kawng (link road) hi a theih anga tam siam kan tum a, a bikin Chief Minister Rubber Mission hnuaia Plantation Cluster-te phei chu kawng sialsak vek an ni ang.

9. Kum tharah khian Mamit leh Kolasib district-a CM Rubber Mission Phase – I a Rubber chinna hmun 11 panna kawng, belhkhawma kilometers 46.50 a thui kan sial dawn - tih te an ni.

Khualzahawm Pu Lalthansanga, Minister, Land Resources, Soil & Water Conservation pawhin thu a sawi a. Rubber chingtute chu hlawhtling ngei tura lo thawk turin a chah a ni.

Kawng hawnna inkhawm hi Pu V. Lalruatsanga, Secretary, Land Resources, Soil & Water Conservation chuan a kaihruai a, Upa R. Lalrinfela'n hunserh a hmang a. Pu Lalchhuanawma, Secretary, Chuhvel Rubber Producer Society chuan an zau hmalakna report tlangpui a pe a ni.

Chuhvelah hian CM Rubber Missions phase 1 hnuaiah in 80 an awm a, kumin July thlaah kha chhungkaw tinin rubber kung 450 theuh an dawng a. A phunna lama an mamawh tinrenga hmanah Rs. 40320 an dawng nghal a. Kumin November-ah khan 2nd instalment Rs. 20160 an dawng leh a ni. An zau panna kawng hi May thlaa laih zawh kha a ni a, kilometres sarih leh a chanve (7.5 kms) a thui niin Rs. 18.9 lakh vel sen a ni a, a thawhna sum hi huan neituten an pawisa dawn atanga an thawhkhawm a ni. He kawng hian rubber huan 80 hi a tlawh kual vek a ni.