Chief Minister-in Rengdilah Kuhva Kut hmanpui

Hnahthial Post | December 9, 2025, Rengdil: Nimin khan Chief Minister Pu Lalduhoma chuan Rengdil Sports Centre-a Rengdil khuaa Kuhva chingtute leh Land Resources, Soil & Water Conservation Department tangkawpin Kuhva Kut an buatsaih chu a hmanpui a. Pu Lalfamkima, Dy. Speaker chuan Chief Minister hi a tawiawm a. Pu Lalthansanga, Soil Minister chu Kutpa a ni.

Chief Minister chuan, Kuhva chingtuten kuminah rate tha tak maia Kuhva in hralh hi kan lawm a, in tana kan beih nasatzia kan hrereng a, a rah duhawm tak in tel chho mek hi nangni aia nasa mahin kan lawm a ni, a ti.

Chief Minister thusawi dangte chu:

1. Kan sorkar tirh phat atanga kan hmalakna langsar zinga mi chu ruihhlo leh Kuhva tawlhruk titawp tura hmalak a ni a, na takin kan nawr. Kuminah Mizoram chanchina Kuhva rate that ber kum a lo thleng ta. Rengdil khua ringawt pawhin cheng nuaih sang chuang zet in lei a ni.

Kuhva tawlhruk do hna thawktu - kan police te, kan tlawmngaipawlte, kan Magistrate leh an thawhpuite pawhin an thawhrim rah - he chanchin lawmawm tak hi - an han hria ang a, an hlim ve ngawt ang.

2. Rengdilah hian chhungkaw 480 vel in khawsa mek a, Kuhva huan in nei deuh vek a. In la neih belh zel dawn niin a lang a. Sum in lalut hnem thin si a, Bank hi nei thei ula kan duh a. Mizoram Rural Bank rawn dahtir dan kan dap dawn a ni.

3. Soil Department chhinchhiah danin tunah hian Mizoramah Hectares singthum (30000) vela zauah Kuhva hi kan ching mek a. Kumina kan thar zawng zawng zat hi kan la hre thei lova. Nikum khan quintals nuaih hnih vel kan thar. A hralhna a awm that phawt chuan Kuhva hian kan ram economy-ah a thawhhlawk tham tawh a ni.

4. Central sorkar lam ngaihdanah Kuhva huan hi zauh zel tawh loh ni se – tih a ni nain, kan kuthnathawktute tan a tha si a, Mizoram sorkar chuan Kuhva huan tihzauh zel hi kan thlawp. Kan flagship scheme Handholding – Loan Component leh CM Special Packages atang hian Kuhva huan hi a siam theih ve ve a ni.

5. A hralhna lama harsatna hi la thleng palh thei reng a nih avangin a process-na neih ve hi tha kan ti a. Buhchangphaiah a process-na hi kan peih tawh a, kan hawng thuai ang. NEC sum cheng Vbc 7.43 hmangin Kuhva Processing Plant Zamuangah leh Chemphaiah kan din mek.

6. Kuhva huan enkawlna tur mamawh hrang hrang in nei tih kan hria a, a Tam enkawlna tur damdawi te, fertilizer-te, tuizem-te, pipe leh link road-te in mamawh a, a tahtawla ngaihtuah zel a ni ang.

7. Tunah hian Soil Department hnuaia thlai Kuhva, Rubber leh Hmunphiah huan panna kawng (link road) siamna tur hi NABARD leh SASCI sum Crore 27.66 hmuh a ni a, link road km 170 a thui hmun hran hranah laih tura ruahman a ni, tihte a ni.

Kutpa Pu Lalthansanga, Minister pawhin thusawiin, Hachhek bial hian tunhma chuan Serthlum in ngah thin a, chumi hnuah Teak in ngah leh a, tunah Kuhva in ngah leh ta hle mai. Mipuite in fingin in taima tih a hriat a ni. Kuhva hi in tluanpui zel theih nan, kuhva smuggling kan do rualin, a enkawlna kawngah tan kan lak a ngai tel a, huan neitute leh department ten theihtawp kan chhuah zel dawn nia, a ti.

Hachhek Bial Kuhva chingtute hian sorkarin chungah lawmthu an lo sawi tawh a, Vairengte lama Kuhva chingtute pawhin sorkar chungah lawmthu an lo sawi tawh bawk a. Kar hmasa lawka Chief Minister-in Saipum a tlawh pawh khan N. Hlimen leh Saipum khawtlang hruaitute chuan Kuhva rate a that tak avanga an lawmzia Chief Minister hnenah hian tawngkain an lo sawi a ni.

Kuhva kut hun khatna hi Er. Vanlalmuanpuia Chhangte, Director, Land Resources, Soil & Water Conservation chuan a kaihruai a, Rev. Lalhmunmawia Pachuau chuan hunserh a hmang a, Pu Victor MS Dawngliana, Secretary, Kuhva Kut Organising Committee chuan report a pe a. Kumina Hachhek biala HBKCP khaw 21-a Kuhva chingtute sum lakluh belhkhawm hian nuaih sangnga leh sawmriat pasarih a chuang tawh a. An la hralh kal mek a, a fur rahte pawh hralh tur an la nei leh dawn a. An lakluh hi a pung chho zel dawn a ni. Hachhek bial chhunga kumina Kuhva hralh tam ber chuan cheng nuaih sawmli a lalut tawh a ni.

Pu Kanan Lalhlimawma, President, Hachhek Bial Kuhva Ching Pawl pawhin thusawiin, Mizoram sorkar chungah lawmthu a sawi a. A ruka kuhva tawlh hi a la awm zauh zauh nia kan hriat avangin, thuneituten hma min laksak zui zel se kan duh hle a ni, a ti.

Hachhek Bial Kuhva Chingtu Pawl hian Chief Minister leh Land Resources, Soil & Water Conservation Minister hi lawmthusawina thuziak an pe a ni.