IPRP&S Minister-in IFFI Indian Panorama-a Jury Member Pu Napoleon RZ Thanga hnenah chawimawina hlan

Hnahthial Post | December 3, 2025, Aizawl: Vawiin khan Pu B. Lalchhanzova, Minister, Information Public Relations, Printing & Stationary (IPRP&S) chuan a office chamber, MINECO-ah Mizote zinga International Film Festival of India-a (IFFI) Indian Panorama (Feature film) jury member atana thlan hmasak ber Pu Napoleon RZ Thanga hnenah chawimawina a hlan.

Minister Pu B. Lalchhanzova chuan Mizote zinga film siam lama sulsutu Pu Napoleon-a chu India ram pum huapa ngaihhlut hlawh leh mi tam tak tel chakna IFFI-a Indian Panorama jury member-a thlan a ni chu chhuanawm a tih thu leh Mizoram tana mellung pawimawh tak a nih thu a sawi a. Mizoram chu kum hnih thum kalta atanga film lama kan thang nasa chu lawmawm a tih thu sawiin kan economy atan a that bakah thalaite tan eizawnna siamtu pawimawh tak a ni, a ti a. Chutihrual chuan Mizoram pawna film festival hrang hrang thleng pha tur film quality tha siam a pawimawh thu sawiin, Mizoram film industry a than zel nan leh film tha zawk siam a nih theih nan tan lak a ngaih thu a sawi a ni.

Pu Napoleon-a hian kum 2006 atang khan film siam tanin, documentary 20 chuang leh short-film 4 a siam tawh a. Films Division, DDK-Aizawl, NEZCC (Min of Culture), State Government (Art & Culture, Agriculture, Sports department) te tan documentary hrang hrang a siamsak tawh a. Pu Napoleon-a film siamte hi Mumbai International Film Festival (MIFF), IFFI Goa, Yamagata (YIDFF), Bangladesh, GIDSAF Guwahati, BVFF (Guwahati), SASF Kolkata, MIDSFF Madurai, Himalayan International Film Festival Ladakh, Itanagar, Imphal, Delhi leh film festival hrang hrangahte chhuah a lo ni tawh a. Hmeichhe naupang ri hriatna thalo chanchin documentary-a a siam ‘Malsawmi’ chuan kum 2010 khan 1st Festival of North East Film 2010, Shillong-ah best film leh best direction lawmman dawngin, ‘We Care Film Festival’ New Delhi-ah 3rd best film lawmman a dawng bawk a ni.

Ministry of I&B-in a buatsaih Mumbai International Film Festival-ah (MIFF) kum 2016 khan Pu Napoleon-a hi film selection member-ah a tel a, Cannes Film Festival-ah kum 2023 khan North East Delegates zingah Mizoram aiawhin a kal tawh bawk a. Kumin IIFI vawi 56-naah khan Indian Panorama (Feature film) jury member atana thlan mi 12 zingah Pu Napoleon-a hi a tel a ni.

Vawiin hunah hian Pi Betsy Zothanpari Sailo, Secretary, IPRP&S, Pu Lalremruata Ralte, Joint Secretary, IPRP&S, Pi K. Vanlalsangi, Director, I&PR, Pi Mina Zoliani Joute, Joint Director, I&PR, Pu Pratap Chhetri, Deputy Director, I&PR leh Pu Remlalliana Hnamte, PS to Minister-te an tel a ni.