Mizoram Primary Teachers’ Association (MPTA) ten zirlaite tanpuina an sem

Hnahthial Post | December 3, 2025, Aizawl: Vawiin khan Mizoram Primary Teachers’ Association (MPTA) ten zirlai harsate tanpuina Student Endowment Fund Zarkawt Community Hall-ah an sem a, School Education Director Pi Angela Zothanpui’n a hmanpui.

MPTA te hian zirlai lehkha thiam thei khawsak harsa te chu tanpuina dawng tur hian an zawng chhuak a, Joint Headquarters 1 leh Sub-Headquarters 18 atangin zirlai pahnih theuh an vaiin 38 an thlang chhuak a, heng mite hi tanpuina an hlan a ni. Tanpuina dawng tur zirlai thlan chhuahte hi a then chu thingtlang kilkhawr tak taka awm te an ni a, Aizawlah an hruaikhawm a, anmahni hruaitute nen an kalna senso an tumsak vek a, Aizawl khawpui chhung hmun pawimawh chi hrang hrang Science centre, Aizawl lungdawh leh Millennium Centre bakah zan lamah Krismas puala Aizawl khawlai cheimawi te an fanpui a, zirlaiten manhla an ti hle. Kumin hi MPTA ten student endowmwnt fund an sem tum thumna a ni.

Student endowment fund sem inkhawm hi Pu R.Zonunmawia Vice President MPTA-in a kaihruai a, Pu Rosangzuala President-in thusawina hun a hmang a, MPTA hruaitute, zirlai tanpuina dawngtute leh anmahni hruaitute an kalkhawm a ni.