Mi huaisen chawimawina 'Jeevan Raksha Padak Award' hlanna hun hmang

Hnahthial Post | December 2, 2025, Aizawl: Vawiin khan Ministry of Home Affairs, Govt. of India atanga mi huaisen chawimawina ‘Jeeven Raksha Padak Award 2025’ dawngtu, Pu Laltlanzova, Tlangsam, Champhai District chu lawmman hlanna leh chawimawina hun, Home Minister, Office Chamber, MINECO-ah hman a ni a; Home Minister Pu K. Sapdanga chuan he Award-in a kentel chawimawina tangkapui, citation leh pawisa fai 1,00,000/- a hlan a ni.

Home Minister Pu K. Sapdanga chuan thu sawiin ‘mizote' n kan ngaihhlut em em chu mi huaisente an ni’ a ti a; pi leh pute hunlai atang tawha kan thupui ber pakhat pawh 'thian chhan thih ngam' tih a nih thin thu sawiin, tunlai khawvelah hetianga mi dangte nunna chhan nana mahni nunna thap ngam, mi huaisen kan nei leh, India ram pum huap chawimawina dawng thei kan nei hi a lawmawmin a ropui takzet a ni' a ti a, thangthar lo awm lehzel turte tan pawh entawntlak tak a nih thu sawiin thalaite pawhin entawna, thian chhan thih ngam rilru chawinung thar leh theuh turin a sawm bawk a ni.

Vawiin hun hmannaah hian Champhai Deputy Commissioner Pu Mohammad Aaquib pawhin thu sawiin Pu Laltlanzova thiltih chu faktlak leh chawimawi phu a nihzia leh Mizote huaisenna chu fakawm a tih thu a sawi a; Pu V. Lalduhzuala, Joint Secretary (NP), Home Department hnen atangin Award dawn a nih theih nana kalphung awmte ngaihthlak niin Pu Lalnunmawia Chhangte, Under Secretary, Home Department hnen atangin Jeevan Raksha Padak Award chungchang ngaithlak a ni bawk a; Pu F. Zodinpuia, Superintendent, Home Department chuan lawmthu sawiin hun a khar a ni.

Jeeven Raksha Padak Award hi chhiatna leh chetsualna kara huaisen taka mi nunna chhanchhuaktute hnena hlan thin niin he chawimawina hi mi huaisen bikte dawn thin a ni a; Pu Laltlanzova hian September ni 7, 2024 (Inrinni) khan Khawzawl District, Dulte khawdai, Dilmawiah tui tla an awm tih a hriat veleh tui tla chhan nan tuiah a zuang lut ve nghal a; Dilmawi hi feet 50 zet a thuk niin, theihtawpa a beih hnuah tui tla hi la chhuakin, a nunna a chhanhim a ni. He a thiltih ropui tak avang leh mi nunna hlu tak a chhanchhuah avang hian Jeevan Raksha Padak Award 2025 dawng tura thlanchhuah niin vawiin December 2, 2025 (Thawhlehni) hian chawimawina hi hlan a ni ta a ni.

Jeevan Raksha Padak Award chu eng nge a nih chiah:

1. Jeevan Raksha Padak Award kan tih hi India rama civil mite hnena lawmman pek thin, midangte nunna chhanhim nana thiltih chawimawi phu, mahni inphat chunga huaisenna lantirtute hnena hlan thin a ni a.

2. September ni 30, 1961 atanga bul tan tawh niin vawiin thlengin India Sorkar chuan a kalpui ta zel a ni.

3. Tui tla leh kangmei laka chhanchhuah ngai te, electric current man te, khuarel chhiatna hrang hrang a lo thlena, chhanchhuahna kawnga tha thawh, lainatna leh ngilneihna lantir chunga mi nunna chhanhima, huaisen taka beitute hnenah he lawmman hi hlan thin a ni. Chutiang hunah chuan a chhanchhuaktu dinhmun chu risk sang tak, mahni nunna hial chan emaw, hliam na tak tuar emaw, dam chhunga ramtuileilo-a chhuah hial theihna emaw te a ni thin a; a huaisen thlak hle a ni.

4. He award hi category 3-ah then a ni a, chungte chu:-

(i) Sarvottam Jeevan Raksha Padak, for acts of extreme danger,

(highest category)

(ii) Uttam Jeevan Raksha Padak for acts of great danger, and

(middle category)

(iii) Jeevan Raksha Padak for acts involving grave bodily injury to the rescuer.

(basic category)

5. Civilian an ni emaw, armed forces, police, fire services, etc. an ni emaw, mi tu pawh, a hmei a pain, an background eng mah thliar lovin, an duty piah lama hetianga huaisenna lantir an nih phawt chuan he award hi pek theih an ni bawk.

6. Tih dan phungah chuan States/UTs leh Govt. of India hnuaia Ministry/Department hrang hrang atangin nomination an call thin a. Chu chu thil thlen atanga kum 2 (calendar year) chhungin Award Committee-in ngun taka en dikin, he award dawng tlaka a ngaihte chu President of India hnenah pawmpui turin recommendation thlen a ni thin a; Presdient-in a pawmpui hnuah chauh puanzar a ni ta thin a ni.

7. He award hian medal (tangkapui), certificate/citation (Union Home Minister sign thlap) bakah sum fai a keng tel bawk.

Sarvottam – Cash award of Rs 2 lakh

Uttam – Cash award of Rs 1.5 lakh

Jeevan – Cash award of Rs 1 lakh

Amaherawhchu he award dawngtute hian lawmman kan sawi tak bak hi chu hamthatna dang, railways leh airfare-a concession kan tih ang chi hi Sorkar atangin an dawng tawh lem lo thung a ni.

Pu Laltlanhlua thiltih hian midangteah a tha zawngin nghawng nei se, huaisenna kawngah leh midangte tana inpekna thuk zawk nei tura midangte zirtirtu lo ni mawlh rawh se.