.jpeg)
Hnahthial Post | December 3, 2025, Aizawl: GeoSmart World Conference & Expo 2025 hnuaia North East Conclave, New Delhi-a neih chu nimin khan Mizoram Larsap General (Dr) Vijay Kumar Singh, PVSM, AVSM, YSM (Retd) chuan telpuiin thu a sawi.
He huna thu a sawinaah Mizoram Larsap General (Dr) Vijay Kumar Singh chuan geospatial intelligence, thukhat vuaa tanrualna leh sik leh sa inthlak danglamin a tihbuai theih loh tura kalphung tha duan chu hmarchhak state tana hmasawnna tluantling nei tura pawimawh a ni, a ti a. Hmarchhak chu a chheng chhiat avang leh inkalpawhna that loh avanga hun rei tak chhung ngaihven loh leh daidar loh a nih dan tarlangin, tunhnai kum 11-12 chhungin a hmelhmang thlak hlawk thei danglamna thlen a ni a, tunhma zawnga thleng ngai lo hmasawnna ruhrel lian tham tak takte siam niin India hmun dangte hmasawnna nen thlunzawm tlat a ni, a ti a. Tunhnaia India railway network-a Aizawl thlunzawm a ni chu mellung pawimawh tak a nih thu leh tlangram chhengchhe taka hmasawnna thlen tura hmalakna chu fakawm tiin, "Hetiang enginnering hlawhtlinna hi tunhma zawnga la hriat ngai loh niin, hei hian India sawrkarin hmarchhak chu a awmdan ngaia awm mai lova tihhmasawn a tum zia a lantir a ni, a ti bawk.
.jpeg)
Mizoram Larsap chuan India ram ruhrela Mizoram pawimawh bikna sawiin, Mizoram chu biodiversity hausa bik, hnam ziarang hausa leh hmun pawimawh taka awm a nih thu a sawi a. Hmun awih leh rualrem lo, lirnghing thlen duhna leh tlang hrang hranga tlem te tea inbawk hran thliah a nih thu sawiin, hengte avang hian ruahmanna siam reng rengah geospatial leh digital technology changkang ber berte mamawh a nih thu a sawi a. Geospatial intelligence chu thil thlen dan tur lo hriat lawkna, kawng siamna, environment humhalhna, chhiatrupna thleng thei leh pawimawh dang dangahte a hman tangkai theih thu a sawi a. Hmarchhakah khuarel thil thlen dan tur engemawchen hrilh lawk thei technology tel lova khawsak a harsat thu sawiin, "Technology hi khawsak tinuamtu ni tawh lovin, sik leh sa inthlak thin laka insiamrem zung zung thei tura hmanraw pawimawh a ni," a ti a. Myanmar leh Bangladesh nena inrina ramri pawimawhna sawiin, drone, sensor, integrated surveillance leh inbiakpawhna tha tak nena dan lova chetvelna ven a tul thu a sawi bawk.
Agroforestry, mau sawngbawlna, renewable energy, ecotourism, horticulture leh kutthemthiamna lama Mizoram theihna tarlangin, technology hmanga hmasawn thlen belh theih a nih thu a sawi a. Awmze neia loneih, lei that leh that loh enfiah, thar theih zat tur zirna leh tangkai taka ram hmante chu kum tin loneih sawn thin leh kan vela thil awmte rualkhai taka awm tlan theihna atana pawimawh a nih thu a sawi a. Northeast pumpui tana geospatial platform inang tlang hman a tul thu sawiin, ram chhung siam ngei drone hman te, GIS, khaw awmdan hrilhlawkna, Al hmanga hmunhma zirchianna, UAV leh climate modelling chhawr tangkai tura thiamna inzirtir nasat a tul thu a sawi a. Hmasawnna thlen turin thawhhona tha neih a tul thu a sawi bawk.
GeoSmart World Conference & Expo 2025 hnuaia North East Conclave hian India hmarchhak pumpui chu mitfuknaah siamin, technology hmanga hmasawnnain India rama biodiversity hausa leh hmun pawimawh tak chang mek hmarchhak state-a danglamna a thlen dante chu thlurbing a ni.
.jpeg)
.jpeg)
.jpeg)
.jpeg)
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
Tags
News