Mizoram State Level Bankers Meeting Chief Minister-in telpui

Hnahthial Post | December 4, 2025, Aizawl: Vawiin khan Aijal Club-ah Mizorama sorkar hriatpui bank awm zawng zawngte intawhkhawmna leh an hnathawh thlirletna State Level Bankers Committee (SLBC) for the quarter ending September 2025 neih a ni a. Chief Minister Pu Lalduhoma chuan a telpui.

Pu Lalduhoma chuan, Chief Minister a nih hnua SLBC a telpui tum hnihna a nih thu sawiin, meeting hmasa atanga tehin hmasawnna duhawm tak tak hmuh tur a awm a. A lawmawm hle a ni. A bik takin CD Ratio nei tha bank pathum MRB, SBI leh Apex Bank te chungah lawmthu ka sawi a ni, a ti. Chutihrualin, bank thenkhat, loan pe chhuak tlem leh lutuk, national benchmark phak lo leh lutukte erawh hi chu en liam mai chi niin kan ngai lo, a ti a. CD Ratio nei hniam ber, 5.30% chauh tlin phak bank pakhat chu an insawifiahna (explanation) a hnena thehlut rang turin a hriattir a ni.

Bank te hi an sum dawn (deposit) tlingkhawm atanga teha zaa sawmruk (60%) tal mipuite hnena puktir (Advance) tura beisei an ni a. Hei hi an hnathawh tehna langsar taka hman a ni thin. Tun SLBC report-a a lan danin YES bank, Bandhan bank, SSFB, AXIS, HDFC, ICICI leh CBI te CD ratio chu 31% aia hniam vek an ni.

Chief Minister chuan, Mizoram sorkar chuan mitin ban phakah bank te hi inzarpharh ula kan duh a, tuna branch kan neih mek 278 zinga 183 te hi Aizawl, Lunglei leh Kolasib-ah an awm a. A dang 95 te hi district dang pariatah an inzarpharh a. Vawiinah hian he SLBC leh RBI hnenah, bank-te inzarpharh dan hi lo ennawn a, thingtlang mipuite ban phaka intizau turin ka ngen a ni, a ti. Mizorama bank branch tam takah thawktu an tlem thin avangin mipui tan an tangkai tur angin an tangkai zo lo thin a. Hnathawktu indaih tawk tak dah tum theuh turin bank thuneitute hi a ngen bawk.

Mizoram sorkar flagship programme Handholding Partner Bank atan bank pathumte chu inremna kan ziahpui a. Anni hian tha taka min thawhpui chuan kan mamawh an phuhru zo turah kan ngai a. Nimahsela, Mizoram State Policy Coordination Committee hnuhnung ber report-ah khan kan partner bank-te Handholding Loan hi zaa sawmli pahnih (42%) te hnenah chauh vawiin thlengin an la pe chhuak a. Sorkarin chak taka kalpui kan duh bawk si a. Partner Bank neih belh mai hi thain kan hria a ni, a ti bawk.

He meetingah hian Pu Khilli Ram Meena, Chief Secretary leh Pu Vanlaldina Fanai, Finance Commissioner te leh Mizoram sorkar official pawimawh eng emaw zat an tel a ni.