Sawrkar hnathawkte intuaihriamna 'Mission Karmayogi' hnuaiah thawh hona tur thuthlung 'MOU' sign a ni

Hnahthial Post | December 3, 2025, Aizawl: Vawiin khan Mission Karmayogi – National Programme for Civil Services Capacity Building (NPCSCB) hnuaia sawrkar hnathawkte intuaihriamna tura hmalakna kal zelah, Mizoram sawrkar leh Capacity Building Commission leh Karmayogi Bharat (SPV) ten thawh hona thuthlung, Aijol Club, Conference Hall-ah an ziak a; Chief Secretary, GoM Pu Khilli Ram Meenaa’n hemi puala inkhawm hi kaihruaiin Mizoram sawrkar aiawhin YLN Reddy, Secretary to the Govt of Mizoram, DP&AR (Good Governance & Training Wing) leh CBC aiawhin Shyama Prasad Roy, CBC Secretary leh Karmayogi Bharat (SPV) aiawhin Ms. Chhavi Bharadwaj, CEO ten MoU hi an sign a ni. Mizoram sawrkar department hrang hranga hotu lian, Secretary rualte leh hotu dangte he hunah hian telin Mission Karmayogi chungchang zir hona hun an hmang nghal a ni.

Chief Secretary Pu Khilli Ram Meena chuan Mission Karmayogi thil tum tlangpuite sawiin, sawrkar hnathawkte’n an chanvo leh an mawhphurhnate, dan in a phut vang mai ni lova rinawmna, dikna leh thathonate nena an hlen theihna tura hmalakna a nih thu te, hriatna leh thiamna mai piah lama inpekna thinlung nena hna an thawh theihna tur te, hun inher danglam zel leh tunlai thiamna technology hrang hrang lo chhuak thar mil zela an in her rem ve zel theihna tur te leh kawng hrang hranga an thiamna leh theihna tih hmasawnna tur a nih thute sawiin, sawrkar tha leh chak a awm theihna tura lungphum pawimawh berte zinga mi a nih thu a sawi.

He MoU hnuaiah hian Capacity Building Commission ten policy duan leh sawrkar kaihhruai hna an thawk anga; Karmayogi Bharat (SPV) ten technical leh digital lam enkawlin iGOT Platform an vil ang. Mizoram Sawrkar nen tang hoin, tunlai mil zelin Capacity Building & Training Plan-te duan a ni anga, Mizoram sawrkar hnathawkte tan intuaihriamna programme hrang hrangte duan niin, chin dan tha zawk leh learning material-te pawh in-share tawn zel a ni dawn a; online-a training theihna iGOT Karmayogi Platform-ah department hrang hrangte leh sawrkar hnathawkte telh niin iGOT kaltlang hian Competency Passbook, Integrated Digital Certificate pek thin an ni dawn a ni.

He thawh hona hian sawrkar inrelbawlna tha zawk leh chak zawk te, mipui leh sawkar inkara inkungkaihna tha zawk te leh mi te berte thleng phak sawrkarna tha te a thlen chhoh zel beisei a ni.