Excise & Narcotics Minister-in TBCC-ah tanpuina sum hlanna leh rilru hriselna chungchang inzirtirna hun a hmanpui

Hnahthial Post | January 9, 2025, Aizawl: Pu Lalnghinglova Hmar, Minister, Excise & Narcotics Department chuan vawiin khan Tawngtai Bethel Camping Centre (TBCC), Sakawrtuichhunah Music Domain Mizoram (MDM), Mizoram State Legal Services Authority (MSLSA) leh National Health Mission (NHM) te tangkawp buatsaih, ‘MDM Winter Blast, 2025 Charity Sum Hlanna’ leh ‘Sensitisation on Mental Health under Legal Services to the Victims of Drug Abuse & Eradication of Drug Menace Scheme’ hun chu khuallian niin a hmanpui a. Pi Lalhmangaihi, TBCC Founder Pu TT Zothansanga nupui hnenah MDM Winter Blast 2025 atanga hmuh chhuah tanpuina sumfai eng emaw zat bakah Excise & Narcotics Department atangin tanpuina sumfai cheng sing hnih a hlan nghal a ni.

Khuallian Pu Lalnghinglova Hmar chuan thu sawiin, TBCC-a awm mekte chu beidawng lo turin a fuih a. Mi tam takin ruihhlo ngaihna atangin nun pangngaia kir leh thei khawpin an sual chhuak tawh tih leh an la dam chhung chu dam chhan leh nun chhan an nei tih hre turin a chah a. An dinhmun chhiat ber lai ni mah se beiseina nena hmalam thlir tlat a, tun aia dinhmun thaa TBCC chu chhuahsan turin duhsakna a hlan a. Sawrkar chuan ruihhlo ngaite che vel a thlir reng tih leh an that chhuahna tur a ngaihven reng tih a sawi bawk a ni.

Thusawitu dang, Pu Vincent Lalrokima, Member Secretary, MSLSA chuan MSLSA chu sawrkarin harsatna tawkte tanpui tura a din a nih thu leh District Court tina Legal Services Authority-te leh Legal Aid Clinic buatsaih thinte chu puih ngaite pui tura an inrin reng thu a sawi a. Ruihhlo ngaite chu nun kawng dik an zawh duh emaw harsatna an tawh a, kal ngaihna an hriat loh emaw pan tur an hriat loh chuan District Court pan tawp turin a sawm a ni.

Pu Vanlalruata, Mental Health Counsellor, Tele Mental Health Assistance and Networking Across States (Tele MANAS) Mizoram pawhin thu sawiin, WHO chuan hriselna a hrilhfiah dan chu chak lohna leh natna neih loh ringawt ni lovin taksa, rilru leh midangte nena inkar tha neih a ni, a ti a. Ruihhlo ngaih chu ‘chronic relapsing brain disorder’ natna benvawn, hun rei tak hnuah pawh dinhmun ngaia let leh thei a ni a, ruihhlo ngaite leh rilru lama harsatna neite tan District Hospital 8-ah puitu tur an awm thu leh engtik lai pawhin 14416-ah phone hmanga biakrawn theih reng an nih thu a sawi a ni.

Vawiin hun hi Pu K. Lalremruata, Assistant Secretary, MDM-in kaihruaiin, Pu JH Lungmuana, ECM, MDM-in tanna hun a hmang a. Pu Tea Boitlung, President, MDM chuan thu sawiin, Pu Danny Vanchhong, General Secretary, MDM atangin report ngaihthlak a ni bawk a ni.

Vawiin hun ang hi nimin lamah Pu TBC Lalvenchhunga, Advisor to CM (Finance) hovin Operation Kingdom Ministry (OKM) Home, Phunchawngah hman a lo ni tawh bawk a ni.