Hnahthial Post | January 9, 2026, Lunglei: India sawrkar Ministry of Minority Affairs hnuaia Pradhan Mantri Jan Vikas Karyakram (PMJVK) Scheme 2020-2021 kal tlanga cheng nuai 596.91 senga Mizoram State Sports Council enkawlna hnuaia infiamna hmunhma sak thar pathum – Basketball & Volleyball Court, Serkawn, Lunglei; Basketball & Volleyball Court, Zotlang, Lunglei leh Futsal Ground, Pukpui, Lunglei chu vawiin khan Lunglei High Powered Committee (HPC) Vice Chairman Pu V. Malsawmtluanga'n a hawng.
Infiamna hmunhma tharte hi Lunglei HPC Vice Chairman Pu V. Malsawmtluanga hian a hmunah kal chilha hawngin, MSSC ai awhin a veng neitu Local Council-te kutah an enkawl turin a hlan nghal a. He'ng hmunhma hawn tharte pual hian Pukpui Futsal Ground-ah inkhawm tawi buatsaih zui a ni.
Lunglei HPC Vice Chairman Pu V. Malsawmtluanga chuan Lungleia ṭhalaite tana infiamna hmunhma ṭha tak tak hawn thar a ni leh ta chu lawmawm a tih thu sawiin, sawrkar kal hmasate hma lakna sawrkar tharin a chhunzawm aṭanga a hlawhtlinna lo lang chhuak a nih thu a sawi a. Party thlei hranna awm lova sawrkarin a enkawl hna Local Council kuta a dah chu hlu leh lawmawm a tih thu sawiin, he'ng hmunhmate sak a nih theih nana khawtlang, Local Council, YMA leh mimal a hmun petute chungah lawm thu a sawi a. Sawrkarin khawtlang tana hmasawnna ruhrel a dinte chu ngaihhlut thiam a pawimawh thu sawiin, a enkawl zui chungchangah dimdawi leh uluk taka enkawl a nih theih nan Local Council-te pawh khauh taka hma la turin a chah.
Pu V. Malsawmtluanga chuan infiamna hmunhma hawn tharte chu a satute an thawk ṭha thawkhata a hriat thu sawiin, hmasawnna hna thawh ṭhenkhatah mipuite beisei phak lo a awm ṭhin avangin hna ṭha a awm theih nan sawrkarin theih tawp a chhuah ṭhin thu a sawi a, hna enkawltu department leh hna thawktu contractor-te'n ram ro tling tura ṭha taka hna thawk ṭhin turin a chah a. Sawrkarin infiamna hmanga ṭhalaite hmasawnna tur hmathlir a neihte tihlawhtlingtu ni tura theih tawp chhuah turin infiam mite leh nu leh pate chu fuihin, sawrkarin hmunhma leh hmanraw ṭha tak tak a chhawpsak chu hmang ṭangkai turin a chah a. Infiamna chu ei zawnna atana hman loh pawhin taksa leh rilru hrisel nei tura insawizawina ṭha tak a nih thu sawiin, chhungkua, kohhran leh khawtlang tana mi ṭangkai ni turin hriselna atana insawizawi chu ṭhalaite'n uar deuh deuh tur leh nu leh pate pawhin tuipui zel turin a chah.
Infiamna hmunhma thar hawnnaah hian Lunglei Municipal Council (LMC) Executive Councillor Pi Lalhruaitluangi Sailo bakah, sawrkar official-te, Serkawn, Zotlang leh Pukpui khawtlang hruaitute, hna thawktu contractor ai awhte leh khawtlang mipui an tel a. Lunglei District Sports & Youth Officer Pu Rozamliana'n hun kaihruaiin, UPC (NEI) pastor Rev. H. Roṭhuama'n hunserh a hmang a. MSSC Assistant Engineer Pu James Lalramnghaka'n technical report a pe.
Basketball & Volleyball Court, Serkawn hi PMJVK aṭanga sum hmuh cheng nuai 139.69 senga sak niin, M/s Junior Consultancy Services, Tlangnuam, Aizawl te'n a sak hna hi an thawk a, September ni 20, 2025 khan zawh fel a ni. He Semi-Indoor Court hi a ruhrel RCC structure leh steel structure hmanga sak niin, a chung atan DYNA roof hman a ni a. Brick wall leh Goat Proof Net hmanga hung kual vek a ni bawk. A chhuat hi RCC-a siam niin, zut mam hnuah rawng hnawih a, line rin a ni a. A chhuat (floor) zau zawng hi 35.00m x 22.60m niin, basketball post leh volleyball post hun sawn theih dah tel a ni bawk.
Basketball & Volleyball Court, Zotlang hi PMJVK aṭanga sum hmuh cheng nuai 139.69 senga sak niin, M/s Junior Consultancy Services, Tlangnuam, Aizawl te'n a sak hna hi an thawk a, September ni 19, 2025 khan zawh fel a ni. He Semi-Indoor Court hi a ruhrel RCC structure leh steel structure hmanga sak niin, a chung atan DYNA roof hman a ni a. Brick wall leh Goat Proof Net hmanga hung kual vek a ni bawk. A chhuat hi RCC-a siam niin, zut mam hnuah rawng hnawih a, line rin a ni a. A chhuat (floor) zau zawng hi 35.00m x 24.00m niin, basketball post leh volleyball post hun sawn theih dah tel a ni bawk.
Futsal Ground, Pukpui hi PMJVK aṭanga sum hmuh cheng nuai 317.53 senga sak niin, M/s Creative Minds, Chanmari West, Aizawl te'n a sak hna hi an thawk a. July ni 7, 2022 khan hna ṭanin, March ni 15, 2025 khan zawh fel a ni. RCC structure leh steel structure hmangin Semi-Indoor-a sak (a chung zar) niin, a chung atan DYNA roof hman a ni a. Brick wall leh Poly Coated Steel Net hmanga hung kual vek niin, zana khelh theih turin stadium light dah tel a ni bawk. A chhuat hi RCC-a siam niin, zut mam hnuah Vinyl Sports Flooring phah a ni a. A chhuat (floor) zau zawng hi 42.00m x 22.00m niin, International Standard, Futsal khelhna tura World Futsal Association-in a pawm a ni a. Mual chhakah 18.00m-a thui leh hmar lamah 44.00m-a thui lungrem (retaining wall) siam a ni bawk.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Post Instagram:
Hnahthial Insta Facebook:
Hnahthial Post YouTube:
Hnahthial Post Twitter:
Tags
News