I LOVE SERCHHIP signage tichhetute man an ni

Hnahthial Post | January 12, 2026, Serchhip: Serchhip khawpui luh dawna I LOVE SERCHHIP tih chhinchhiahna tichhetute chu Serchhip Police ten an man.

I LOVE SERCHHIP signage-a hawrawp E & S te chu a chhia tih hmuhchhuah niin Deputy Commissioner Office, Serchhip District chuan a tichhetute man chhuah an nih theih nan Serchhip Police Stationah rang takin FIR an thehlut a. Serchhip Police Station C/No.94/25, dt.1.12.2025, 324(3) BNS ziahluh nghal niin chak taka chhui zui nghal a ni a. Investigation kalpui a nih chhung hian mi chi hrang hrang thu zawh fiah an nih hnu ah, he thil thlenga mawhphurtute pahnih- Serchhip Field Veng leh Serchhip Hmar Venga chengte chu man an ni a. He sign hi an tihchhiat ngei a nih thu an inpuan hnuah, an pahnih hian District Jail ah dahluh an ni.

I LOVE SERCHHIP tihchhiat chungchangah Serchhip DC Pu Paul L Khuma chuan rang taka police ten pawi khawihtute an man avangin lawmthu a sawi a. Serchhip Beautification Project hnuaia hmalakna peng hrang hrang te mai bakah, sawrkarin mipui tana ruhrel a din te reng reng hi mipui ta a nih anga neitu thinlung nen enkawl turin District mipuite a chah a. Vantlang hmun pawimawhte tihhmelhem leh tihchhiat chu danin a khap a, phalna la hmasa loa mimal leh pawlhoin lo tihdanglam pawh dan bawhchhiatna a nih thu DC chuan mipuite a hriattir nawn leh a. Hetiang thil a thlen tawh lohna tur leh, vantlang thil tihchhiat avanga hrem ngai an awm tawh loh nan thawhhopuiah mi tinte a sawm a ni.