Hnahthial Post | January 12, 2026, Champhai: Tourism Minister Pu Lalnghinglova Hmar chuan vawiin khan Vangchhia khuaah Kawtchhuah Ropui, Zofate Thlangtlak Gate-a PRASHAD (Pilgrimage Rejuvenation & Spiritual Augmentation Drive) hnuaia project kal mek - Cultural & Heritage Centre hmunhma a tlawh.
Minister Pu Lalnghinglova Hmar chu Vangchhia VC leh khawtlang te'n VC Office tualah hun tawi an hman pui a, he hunah hian Minister chuan thu sawiin he project tan dan leh hna thawh tawh te a sawi. Tourism hi khawtlang leh mipui nen inkungkaihna tha a awm a tul thu sawiin project tantu chu sawrkar ni mahse, a thawk hah tur leh a hlawkna tel tur chu mipui an nih thu a sawi a, Mizoram hmun hrang hrangah khualzin hip tura hmunhma leh event siamchawp a ngaih laiin Vangchhia chuan mikhual hiptu tha tak an neih sa avangin an vannei hle a, mikhual tam zawk an neih zel theih nan project kal mek tha taka lo enkawl tur leh mikhual lo chhawn tha zel turin a fuih a. Sawrkar tum danah chuan tourist lodge sak rup ai chuan homestay siam a tum zawk a, chung hmalaknaah chuan mipui lo tang zel turin a sawm bawk a ni.
Minister Pu Lalnghinglova Hmar hi Pi R. Lalrodingi, Director, Tourism Department; Pu Henry C. Lalrawnkima, Secretary, Mizoram State Sports Council leh Vangchhia khawtlang hruaitute an tawiawm a ni.
Vangchhiaa project hi "Development of Basic Amenities under PRASHAD Scheme at Vangchhia" tih a ni a, pawisa duan zat hi cheng vaibelchhe 5.4732 a ni. A hmunah hian rainwater harvesting tank te, solar streetlight leh khualzin mamawh leh lawm tur tam tak siam tum a ni. Kawtchhuah Ropui hi Archaelogical Survey of India hnuaia Protected Monument a ni a, saptawngin "Menhirs and Caves at Vangchhia" tih a ni.
Tags
News