Hnahthial Post | January 28, 2026, Aizawl: Vawiin ni 28 January, 2026 (Nilaini) khan MZP General Headquarters Executive Committee Meeting vawi 649-na neih a ni a. Meeting-ah hian Forest Conservation Amendment Act, 2023 (FCAA) chungchang, MZU Finance Officer chungchang leh Mizoram sorkar in a By-heart system tihbo nan a HSLC leh HSSLC Top-10 leh Division tarlan a nih tawh loh tura ruahmanna an siam chungchang rel a ni. Meeting hi Dr. C. Lalremruata, President chuan a kaihruai a ni.
Executive Meeting chuan, Forest Conservation Amendment Act, 2023 (FCAA) chungchang chu ngun takin a ngaihtuah a, Study Group zirchianna atanga sawiho a nih hnuin, he dan hi Mizoram leh hnam tana tha lo leh kan hnam kal zel tur atana him lo a nih avangin MZP chuan tha a ti lo a. Mizoram Assembly in he dan hman theiha a lo passed tawh chu sut leh ngei turin MZP chuan thuneitute a ngen a ni.
Meeting chuan, Mizoram University Finance Officer tunhnaia lak chungchang a ngaihtuah a. Kan State a zirna in sang berah dan palzut na tam tak awma hnalak a ni chu MZP chuan hriatthiam har a ti hle a, hetiang thil hi a thlen nawn tawh loh na tur leh MZU zahawmna humhim a nih theihna turin MZP chuan a tul angin hmalak a rel a. Hei bakah hian Mizoram-a Central Institution hrang hrangte chu dan dik taka hnalak kalpui thin turin a ngen in a hriattir bawk a ni.
Hei bakah hian Mizoram sorkarin HSLC leh HSSLC Top-10 te result bu-ah session thar 2026-2027 atanga tarlan a nih tawh loh tur thu a sawi chu ngun takin a ngaihtuah a, zirlaite leh zirnain inkarah inelna thianghlim zawk a awm zel theihna turin HSLC leh HSSLC-ah Top-10 tarlan leh anih ngei theih nan thuneitute ngun taka ngaihtuah nawn turin MZP chuan a ngen a. Zirna in leh zirlaite inkarah thiamna tak tak a lanchhuah theihna turin result bua tarlan loh ngawt aiin, exam pattern leh question siam dan chu ngun taka ennawn zawk turin MZP chuan thuneitute a ngen a ni.
Meeting-ah hian, MZP Inter College Volleyball Tournament chu February thla chhunga khelh tur te, Thangram Cultural Meet neih dan tur leh pawl chhung thil pawimawh hrang hrang rel a ni.
