Hnahthial Post | January 28, 2026, Aizawl: Hnathawhna hmuna hmeichhiate chunga hleihlenna thleng thin laka invenhimna pakhat, Prevention of Women from Sexual Harassment (POSH) Act, 2013 chungchanga zirtirna pe chhawng tura thlanchhuah Master Trainer 54-te tan ni thum awh tur training buatsaih a ni. He ‘Training of Master Trainers’ hi Lianchhiari Run Conference Hall, I&PR Directorate ah neih niin, Directorate of Women & Child Development leh SAKSHI-Delhi tangkawp in an buatsaih a ni a, January ni 30, 2026 (Friday) thleng a awh ang.
Tun tuma Master trainer tura ruat te hi Mizoram district tin atanga thlanchhuah an ni a. SAKSHI-Delhi atangin mithiam pathum – Pi Sheetal Mothey, Pi Naomi Joy Yadav leh Pi Smita Bharti te’n ziritrna an pe a. Training chhung hian chipchiar taka POSH ACT, 2013 zirhona mai bakah hmeichhiate humhimna kaihhnawih Dan hrang hrang – Protection of Women from Domestic Violence Act, Prohibition of Child Marriage Act, Indecent Representation of Women Act , Immoral Traffic (Prevention) Act chungchang zirhona neih a ni ang.
POSH Act hi sorkar leh private hnathawhna in tawh phawtah chuan hman vek tur a ni a. State chhungah chuan Directorate of Women and Child chu a Nodal Department niin, pisa tinah Nodal Officer leh Internal Committee ruat theuh tur niin, kawng hrang hrangin hmalak a ni. Hemi atan hian tun tum training ah pawh hian Internal Committee hnathawh dan tru te, case hrang hrang awm thei leh lo awm tawh te zirhovin, Inquiry lak dan te, documentation leh report siam dan leh adangte a tel a ni.
Training programme hi Pi Zoramthangi Chhangte, Director, Women & Child Development chuan a hawng a. Hnathawhna hmunah mipa leh hmeichhiate tana hnathawhna hmun him leh zahawm siam a pawimawhzia a sawi a ni. Joint Director Pi Sailopari leh Deputy Director (Women) Pi Flora Laltanpuii te hnen atangin thusawi ngaihthlak a ni bawk. Pi Lalrammawii Kawilam, Assistant Director leh State Nodal Officer (Samarthya) chuan lawmthu sawiin hun a khar a ni.
Tags
News