Hnahthial Post | January 28, 2026, Aizawl: Vawiin khan Central Silk Board, Ministry of Textiles Govt. of India leh Sericulture Department, Govt of Mizoram te huaihawtin Sericulture Farmers-te ni ‘Resham Krishi Mela’ chu Sericulture Training Institute Zemabawk-ah buatsaih a ni a, Sericulture Minister Pu Lalthansanga’n hun hmanpuiin Pi Florence Zotluangpuii, Secretary, Sericulture Department chuan hun a kaihruai a, Sericulture farmers mi 100 chuang leh entrepreneurs leh officials te an kalkhawm a ni.
Minister Pu Lalthansanga chuan thu sawiin Mizorama Sericulture khai dingtu ber chu thingtlang hmuna Maimaw pangang khawitute an nih thu a sawi a. Bana kaih Policy hnuaiah Chief Minister Pu Lalduhoma hoin chak taka ke pen a nih mek thu sawiin, Sericulture Department thuam chak nan pawh hmalak reng a nih thu leh chak zawka hna thawh a nih theih nan thawktu mi thar pawh lak belh an nih thu a sawi bawk. Farmers te chu thahnem ngai taka thawk tur leh teirei peihna nei turin a fuih a, Resham Krishi Mela tangkai taka hmang turin duhsakna a hlan bawk a ni.
Vawiin hun hmannaah hian chawhma-ah Dr Gandhi Doss, Central Silk Board - CSR&TI, Berhampore te, Pu Lalrinawma Director, Department of Sericulture leh Dr. Lalthlamuana Pachuau, Scientist D, REC, Aizawl ten Mizorama Maimaw pangang khawia hmasawnna tur kawng hrang hrangte leh technical lam hawia farmers-te hmasawnna turte an sawi a; chawhnu hunah Pu B Lalchhuana, Joint Director, Sericulture Department chuan technical session kaihruaiin, zawhna leh chhanna hunte hman a nih hnuin Dr. Pavan JS. Scientist -B, CSB-REC, Aizawl chuan lawmthu sawiin Resham Krishi Mela hi a khar a ni.
Resham Krishi Mela-in a tum ber chu, Maimaw pangang khawi hmanga thingtlang mite’n eizawnna ngelnghet an neih theihna tur kawng inkawh hmuh te, farmers-te leh Technical staffs te inkara thawh hona tha siamte leh kawng hrang hranga sericulture hmasawn zelna tur atana hmalakte a ni.
Tags
News