Pang Zirlai Pawl buatsaih Pang hnam Kut, Naumariamlak Kut (Nau Lawm Kut) Chief Minister-in hmanpui

Hnahthial Post | January 8, 2025, Hnahthial: Vawiin khan Pang Zirlai Pawl huaihawtin Pang hnam Kut ropui ber leh ngaihhlut hlawh ber pakhat, Naumariamlak Kut (Nau Lawm Kut) chu Vathuampui khelmualah hman a ni a. Chief Minister Pu Lalduhoma chuan a hmanpui a, thu a sawinaah Chief Minister chuan kum tam tak Pang Zirlai Pawlten an lo dil tawh thin Pang Hostel chu Aizawl Ainawn venga sak tum a nih thu a puang.

Thusawiin Chief Minister chuan, Zo hnahthlak hnam peng hrang hrangte hian zia leh tih dan kan nei hrang thliah thliah a. Heng kan hnam peng ziate hi a riralin kan theihnghilh ang tih a hlauhawm thin. Thangtharten kan hnam ze tha tak tak te, kan tawng te, kan thu leh hlate a boral loh nan tha taka kan humhalh thiam a ngai hle. Hnam peng hrang hrangte huikhawmtu tha tak mai chu zirlai pawl hi an ni thin a. Pangfate huikhawmtu atan pawh hian Pang Zirlai Pawl tluka chak leh huapzo hi in nei lo mai thei. Chuvang chuan zirlai pawlte hmalakna hi ka fakin tha ka ti thin hle a ni, a ti.

Pang hnam chu Mizo hnam zinga thlang tla hmasa pawl an nih a rinawm thu sawiin Chief Minister chuan, hnam lian tak ni chungin in hnam chanchin chhiar tur hi a tam lo viau mai a. Hei hi thangthar fing zawkten rawn vei ula, ziaka dah i uar ang u. Mizo hnam tobul chhui chian hi sorkar chuan tha kan ti a, hma kan la mek a. Mipui nawlpui pawmtlan theih history rintlak kan chhuina kawngah pawh Pang history hian dinhmun pawimawh tak a luah hialin ka ring a ni, a ti.

Mizoram chhim lam bial chu engtikah emaw chuan Mizoram kawtchhuah a nih tur thu sawiin Pu Lalduhoma chuan, Ministry of DoNER hnuaia High Level Task Force on Northeast Economic Corridor ah Chairman ka ni a. India hmarchhak ramten kan hlawkpui theih inkalpawhna kawngpui tha kan neih theih dan tur kan sawiho thin. KMMTTP hi Mizote chauh ni lovin kan thenawm state te pawhin an nghakhlel em em a. Puitling thuai thuai se an duh a ni. Hman ni lawk khan Myanmar ram chhunga KMTTP kawngpui sialtu Company hotute nen kan inkawm a, kum 2027 ah an hna hi thawh zawh theih an inbeisei a. A taka kan chhawr hun hi a hla tawh lova, a tangkaipui bertu tur chu Lawngtlai district hi in ni, tiin KMMTTP hmalakna tlangpui a sawi a.

A kaihhruai sorkarin kum hnih chhunga hmasawnna hmel a hmuh thenkhatte a tarlang a, sum leh pai enkawl thuah te, mipui vantlang hriselna lamah leh Healthcare lamah te, kuthnathawktute thlai tharchhuah hralhna kawngah te, inkalpawhna kawngah te, Power sector-ah te, zirna sang zawk lamah te, khuarei daih hmasawnna ke chheh (sustainable development) lamah te nasa takin hma kan sawn a. Kan ram hian kawng dik a zawh mek a ni, a ti.

Zirlaite chu zirna ngaipawimawh tura fuihin, hriatna leh finna hian mihring theihna a ti pung a, mipui nawlpui hmasawnna a thlen thin. Pang thalaiten zirna lama hma in sawn zel theih nan, kum tam tak in lo dil tawh thin Pang Hostel chu Ainawn Vengah Pang hostel sak kan tum dawn a ni, a ti a. Zirna ngaihlu hnam apiang an dingchang zel a, Pang thalaiten lo ngaihlu rawh u, tiin a fuih.

Khawtlang nun ralmuang leh hmasawn a awm theih nan ruihhlo leh sualna dang laka fihlim turin a chah a, hlim taka kut hmang turin duhsakna a hlan a ni.

Kut inkhawm hi Pu Lalramliana’n a kaihruai a, Pu Lalbiakkiman hunserh a hmang a, Pu Albin Lalhruaitluanga, President, Pang Zirlai Pawl chu Kut thlengtu a ni. Pu Laldikzuala chuan report a pe a ni.

Pang hnam hi tunah hian Mizoramah sing nga chuang an awm mek nia sawi a ni a, Bangladesh lamah mi sing hnih vel a cheng nia sawi a ni bawk a. Mizoram leh India ram state hrang hrangah pawh eng emaw zat an khawsa a ni.